ეკონომიკის მინისტრობის კანდიდატის, ნათია თურნავას თქმით, ამ ეტაპზე მოქალაქეებისთვის გაზის ტარიფის ცვლილება არ იგეგმება. ამის შესახებ მან საკოორდინაციო საბჭოს დასრულების შემდეგ განაცხადა.

"ჩვენ გვქონდა არაერთხელ კომუნიკაცია თბილისი ენერჯისთან და რამდენადაც ჩვენ ვიცით, ეს არ არის რეგულირებადი ტარიფი. ამ ეტაპზე ეს ტარიფი არ გადაიხედება, არ შეიცვლება. შეიძლება ბიზნესს ხარჯები უძვირდებოდეს, მაგრამ მომხმარებლის და ბიზნესების გადამხდელუნარიანობა არის საკმაოდ კითხვის ნიშნის ქვეშ. არ არის მარტივი წელი", — ამბობს თურნავა.

შპს თბილისი ენერჯი 2021 წლის 3 იანვრიდან კომერციული მომხმარებლებისთვის, პურის საწარმოების გარდა, გაზის ტარიფს აძვირებს. კომპანიაში აცხადებენ, რომ არასაყოფაცხოვრებო აბონენტებისთვის ბუნებრივი აირის ფასი ერთ კუბურ მეტრზე 1 ლარითა და 10 თეთრით განისაზღვრება, დამატებული ღირებულების გადასახადის ჩათვლით.

კომპანიაში, აღნიშნავენ, რომ ბუნებრივი აირის ფასი საყოფაცხოვრებო მომხმარებლებისთვის არ ძვირდება, რომელიც 1 კუბურ მეტრზე 0,461374 ლარს შეადგენს და დადგენილია სემეკის მიერ.