თბილისის მერის, კახა კალაძის განცხადებით, არცერთი შენობა, რომელიც დღეს აფრიკის დასახლებაში დემონტაჟს დაექვემდებარა, არ ყოფილა დასრულებული. მისი თქმით, ყველა მშენებარე იყო.

"მინდა გამოვეხმაურო პოლიტიკური პარტიების მიერ ცილისმწამებლურ, მეტიც, დანაშაულებრივ განცხადებებს, რომ თითქოს მერიამ ხალხი გამოიყვანა დასრულებული სახლებიდან და ღია ცის ქვეშ დატოვა. სრული პასუხსიმგებლობით ვაცხადებთ, რომ არცერთი ნაგებობა, რომელიც დემონტაჟს დაექვემდებარა, არ იყო დასრულებული. იყო მშენებარე და მასში არ ცხოვრობდნენ ადამიანები", — განაცხადა კალაძემ.

თბილისში, აფრიკის დასახლებაში ქალაქის მერიამ შენობა-ნაგებობების დეონტაჟი დაიწყო. არსებული ინფორმაციით უკვე 20-მდე მშენებარე სახლი დაანგრიეს. ადგილობრივ მოსახლეობასა და პოლიციას შორის ფიზიკური დაპირისპირებაც მოხდა. შედეგად 8 ადამიანი დააკავეს.