Guardians of the Galaxy-ის კომიქსის ბოლო ნომერში კოსმოსში თავგადასავლების მაძიებელი პიტერ ქუილი, იგივე სტარლორდი (Star-Lord), პოლიამორულ ბისექსუალურ ურთიერთობაშია ნაჩვენები.

თავგადასავალში, რომელის სახელიცაა "I Shall Make You a Star-Lord", Guardians of the Galaxy-ის #9 ნომრის მოვლენებისას ქუილი თითქმის 150 წელს ატარებს უცნაურ მიწაზე, მორინუსზე, სადაც ის ჰუმანოიდების წყვილს უმეგობრდება — ქალ არადიასა და კაც მორსს. საბოლოოდ, დაახლოებით 12 წლის შემდეგ, მას ორივე მათგანთან აქვს ურთიერთობა. "უკვე ათწლეულზე მეტი გავიდა. დროა, სიმართლე მივიღო... მორინუსი ჩემი სახლია. თქვენ ჩემი სახლი ხართ", — ეუბნება ქუილი წყვილს. კომიქსის ეს ნომერი ალ ევინგმა დაწერა, მხატვარი კი ხუან კაბალია.

ფოტო: Marvel

უცნობია, გამოჩნდება თუ არა სტარლორდის კომიქსების ვერსიის ბისექსუალიზმი დიდ ეკრანებზე გალაქტიკის მცველების მესამე ფილმში, სადაც პერსონაჟს კრის პრატი ასრულებს.

აღსანიშნავია, რომ 2019 წლის თებერვალში პრატმა დაიცვა ჰილსონგის ეკლესია, რომელშიც თვითონ დადის, მას შემდეგ, რაც Umbrella Academy-ის ვარსკვლავმა ელიოტ პეიჯმა ამ ეკლესიას ბრალი დასდო იმაში, რომ ის "ანტი-ლგბტ" იყო.

"ცოტა ხნის წინ თქვეს, რომ იმ ეკლესიას ვეკუთვნი, რომელსაც 'ადამიანთა ზოგიერთი ჯგუფი სძულს' და რომელიც 'ანტი-ლგბტ' არის. ეს ნამდვილად არაა ასე. მე იმ ეკლესიაში დავდივარ, რომელიც ყველა ადამიანს უღებს თავის კარს", — დაწერა პრატმა მაშინ Instagram-ზე.