თუ გაქვთ საინტერესო იდეა, რომლის განხორციელებაზეც დიდი ხანია ფიქრობთ, მაგრამ საკმარისი მატერიალურ-ტექნიკური რესურსი არ გაგაჩნიათ, იდეების კონკურსი საქართველო ჩემი სახლია/I Belong სწორედ თქვენთვისაა.

კონკურსში მონაწილეობისათვის მთავარია, რომ თქვენი იდეა უმცირესობებსა და მათ ინტეგრაციას ეხებოდეს, რადგან საქართველო ჩემი სახლია/ I Belong განსხვავებული რელიგიური კუთვნილების, ეთნიკური წარმომავლობის, სექსუალური ორიენტაციის ადამიანთა შესახებ არსებული სტერეოტიპების მსხვრევას ისახავს მიზნად.

იდეის წარმოდგენა შეუძლია ნებისმიერი პროფესიის ადამიანს ან საინიციატივო ჯგუფს ელექტრონული ფორმით ონლაინ-პლატფორმაზე.

განცხადების შევსება საკმაოდ მარტივია. ჩამოაყალიბეთ, რისი შეცვლა გსურთ საზოგადოებაში, რატომ არის ეს მნიშვნელოვანი და მიუთითეთ, რა გჭირდებათ იდეის სისრულეში მოსაყვანად.

სააპლიკაციო ფორმა ინგლისურ ენაზეა, თუმცა იდეების წარდგენა სამ: ქართულ, ინგლისურ ან რუსულ ენაზე შეგიძლიათ.

პროგრამა ითვალისწინებს მცირებიუჯეტიანი ინიციატივების დაფინანსებას. თქვენს იდეას შინაარსის მიხედვით შეაფასებენ.

გაითვალისწინეთ, რომ ორგანიზაცია არ გასცემს ფულად გრანტს, ის დაგიფინანსებთ მხოლოდ მატერიალურ რესურსებს, ნივთებსა თუ სერვისებს, რომლებიც იდეის განსახორციელებლად დაგჭირდებათ.

აპლიკაციის შევსების ბოლო ვადა 31 იანვარია, ხოლო გამარჯვებულების ვინაობა თებერვლის დასაწყისში გახდება ცნობილი.