საქართველოს პარლამენტის თავმჯდომარის, არჩილ თალაკვაძის თქმით, სამართლიანი არჩევნების დღევანდელი განცხადების შემდეგ, რომლის მიხედვითაც ISFED-ის პარალელურ დათვლაში მიღებული ხმების გამოსათვლელ ფორმულაში ხარვეზი გამოვლინდა, მთელმა ოპოზიციამ ბოდიში უნდა მოიხადოს.

"ვინაიდან, ოპოზიციის მთავარი ბრალდება, რომ თითქოს არჩევნები გაყალბდა, ეს არის უსაფუძვლო და დღეს უკვე დადასტურდა ამ განცხადებით, პარალელური დათვლის შედეგებით. არჩევნებში არანაირი გაყალბება არ ყოფილა და მანდატების რაოდენობა ზუსტად ისეა გადანაწილებული, როგორც ეს ცენტრალურმა საარჩევნო კომისიამ თავის შედეგებში აჩვენა", — ამბობს თალაკვაძე.

ISFED-ის ცნობით, ხმების პარალელური დათვლის პირველადი შიდა აუდიტის შედეგებმა PVT მეთოდოლოგიის სიზუსტე და დამკვირვებლების მიერ მოწოდებული ინფორმაციის სანდოობა დაადასტურა. თუმცა გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში.

მანამდე ცნობილი გახდა, რომ მმართველი პარტიის წარმომადგენლები ISFED-ს შეხვდნენ. ქართულ ოცნებაში აცხადებდნენ, რომ შეხვედრა ISFED-ის მიერ ჩატარებული პარალელური ხმის დათვლის შედეგებს ეხებოდა და მათ ორგანიზაციას მეთოდოლოგიის შესახებ მონაცემების წარმოდგენა მოსთხოვეს.