პარტია მოქალაქეების ლიდერი, ალეკო ელისაშვილი ამბობს, რომ თუ ციხიდან პოლიტპატიმრები არ გამოვლენ, პარლამენტში არ შევა. მთავარი არხის ეთერში მან აღნიშნა, რომ ელჩებთან მოლაპარაკებებზე ამაზე საუბარი მიდის, თუმცა დეტალებზე ვერ ისაუბრებს.

"არა, 11-ში არ შევდივარ, შანსი არაა, პოლიტპატიმრები არ გამოვლენ და არ შევალ პარლამენტში", — აღნიშნა მან.

ამავე დროს, ელისაშვილის განცხადებებიდან ირკვევა, რომ ის პარტიული სიის გაუქმებაზე განცხადებას ხელს არ მოაწერს.

როგორც ელისაშვილი ამბობს, ქართულმა ოცნებამ დაიხია ოთხივე საკითხზე, რომელიც მათ შეხვედრაზე მიიტანეს. ელისაშვილის განმარტებით, როგორც მოთხოვნები ეხება რიგგარეშე არჩევნებს, პოლიტპატიმრების გათავისუფლებასა და საარჩევნო რეფორმას.

ამასთან, ოპოზიციონერი ლიდერი სხვა დეტალებზე არ საუბრობს, თუმცა აღნიშნავს რომ პლებისციტის მოთხოვნას არ ეთანხმება და მას "ხლაპუშკას" უწოდებს.

11 დეკემბერს მეათე მოწვევის პარლამენტის პირველი სხდომის პარალელურად ბარიერგადალახული ოპოზიციური პარტიები, პატრიოტთა ალიანსის გამოკლებით, გეგმავენ ხელი მოაწერონ მემორანდუმს, რომლითაც მანდატებზე უარს იტყვიან.

ორი დღით ადრე პარტია მოქალაქეების ლიდერმა, ალეკო ელისაშვილმა ფეისბუქლაივის დროს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა.

ამავე თემაზე: