როცა წყვილს ურთიერთობა წლების განმავლობაში აქვს, გარშემომყოფები გამუდმებით ეკითხებიან: "ქორწილს როდის აპირებთ?". ეს კითხვა პანიკას განსაკუთრებით იმ წყვილებში იწვევს, რომელსაც მასზე პასუხი არ აქვს. ამასთან, დროის გასვლასთან ერთად, ტრადიციულ საზოგადოებებში, ხშირად იზრდება საზოგადოებრივი წნეხი, რომ წყვილი დაქორწინდეს.

ერთმა ზამბიელმა ქალმა კი გადაწყვიტა, რომ ნიშნობის ბეჭდისთვის საკმარისად დიდხანს იცადა და ურთიერთობის 8 წლის შემდეგ ხელის ართხოვნის გამო თავის შეყვარებულს სასამართლოში უჩივლა. ამის შესახებ კენიური გამოცემა Tuko იუწყება.

26 წლის გერტრუდ ნგომა და 28 წლის ჰერბერტ სალალიკი ერთმანეთს 8 წლის განმავლობაში ხვდებოდნენ. ბოლოს, როგორც იქნა, ჰერბერტი ნგომას მასზე დაქორწინებას დაპირდა. თუმცა ზღაპრული დღის მოლოდინით დაღლილმა გერტრუდმა შეყვარებული ქორწინების სახლის ნაცვლად სასამართლოს გზას გაუყენა და მოითხოვა, რომ მან სამომავლო გეგმები ჩამოაყალიბოს. საქმეს ისიც ამძაფრებს, რომ გერტრუდს და ჰერბერტს უკვე ჰყავთ შვილი, თუმცა ნგომა მაინც თავის მშობლებთან ერთად ცხოვრობს და მიაჩნია, რომ თავისი შვილის მამა არასერიოზულად უდგება მათ ურთიერთობასა და მომავალს.

"არასდროს ყოფილა სერიოზული, სწორედ ამიტომ გადაწყვიტე, რომ სასამართლოში მომეყვანა — რადგან ვიმსახურებ, ჩვენი მომავლის შესახებ ვიცოდე", — ამბობს გერტრუდი.

თავდასაცავად, ჰერბერტი აცხადებს, რომ მას ქორწილის გადასახდელად საკმარისი ფინანსები ჯერ არ აქვს, თუმცა იგი ალიმენტს მაინც უხდის შვილს. ამასთან, კაცი დასძენს, რომ ქორწინების გაჯანჯლების ერთ-ერთი მიზეზი გერტრუდისგან მოკლებული ყურადღებაა.

რაც უნდა გასაკვირი იყოს, ზამბიის სასამართლომ წყვილი მათ საქმესთან ერთად გაისტუმრა დარბაზიდან და განუცხადა, რომ, რადგან ისინი დაქორწინებულები არ არიან, სასამართლოს გარეშე მოუწევთ მორიგება.