ამ წუთებში ნაციონალური მოძრაობა საპროტესტო აქციას მართავს შინაგან საქმეთა სამინისტროსთან საქართველოს მოქალაქის, ყოფილი სამხედროს, გია ცერცვაძის დაცვის მოთხოვნით.

ნაციონალური მოძრაობა მოითხოვს, რომ საქართველოს ხელისუფლებამ გაატაროს ყველა ზომა, რათა გია ცერცვაძე გათავისუფლდეს, გაიზარდოს ზეწოლა უკრაინაზე, რათა არ გადასცეს რუსეთს, ასევე, გამოკვეთონ ის პირი, რომლის უპასუხისმგებლობის გამო მან დაუბრკოლებლად დატოვა საქართველოს საზღვარი და ჩავიდა უკრაინაში.

ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში, ინტერპოლის მოთხოვნით დააპატიმრეს.

რუსთავი 2-ის ინფორმაციით, რუსეთიდან უკრაინაში გადაგზავნილ საქმის მასალებში წერია, რომ ქართველ ჯარისკაცს 2003 წელს რუსეთში ჩადენილი მკვლელობისთვის ინტერპოლით ეძებენ.

ოპოზიციამ ხელისუფლება დაადანაშაულა რუსეთისთვის გია ცერცვაძის შესახებ ინფორმაციის მიწოდებაში, თუმცა ეს ბრალდება ხელისუფლებამ უარყო.

საქართველოს პროკურატურამ ამ საქმეზე განცხადება დღეს გაავრცელა.

პროკურატურის ინფორმაციით, უწყების მიერ უკრაინელ კოლეგებს ეცნობათ ცერცვაძის შესახებ საჭირო ინფორმაცია და განმარტება მისი ძებნის ინიციატორი მხარისთვის გადაცემის მიზანშეწონილობის თაობაზე.

„საქართველოს მოქალაქის რუსეთის მხარისთვის გადაცემით დაირღვევა გიორგი ცერცვაძის ძირითადი უფლებები,“ - აღნიშნულია პროკურატურის მიერ გავრცელებულ განცხადებაში.