ქართული ოცნების აღმასრულებელი მდივნის, ირაკლი კობახიძის განცხადებით, 9 ან 10 დეკემბერს ოპოზიციასთან ბოლო შეხვედრა გაიმართება. ამის შესახებ მან აშშ-ს ელჩის რეზიდენციის დატოვების შემდეგ განაცხადა.

კობახიძის თქმით, მათი მხრიდან საარჩევნო რეფორმის საკითხები განიხილება და ბევრ საკითხთან დაკავშირებით არის შეჯერებული პოზიციები.

"ხვალ ან ზეგ შედგება ბოლო შეხვედრა, რადგან პარლამენტის სხდომა უკვე ახლოვდება და ძალიან დიდი იმედი გვაქვს, რომ ეს შეხვედრები წარმატებით დასრულდება. ოპტიმისტურად ვართ განწყობილნი", — აღნიშნა კობახიძემ.

ელჩების შუამავლობით ოპოზიციასა და ქართულ ოცნებას შორის მოლაპარაკებები გრძელდება. ორივე მხარე აცხადებს, რომ ჯერ შეთანხმება მიღწეული არაა, თუმცა პოზიციები უფრო დაუახლოვდა ერთმანეთს.

ოპოზიცია საკანონმდებლო ორგანოში შესვლას კვლავ არ აპირებს, მმართველ პარტიაში კი იმედი აქვთ, რომ მეათე მოწვევის პარლამენტი ერთპარტიული არ იქნება.

ახლადარჩეული პარლამენტის პირველი სხდომა 11 დეკემბერს გაიმართება. მხარეები ამბობენ, რომ შეხვედრები კიდევ გაიმართება, თუმცა ზუსტი თარიღი ისევ უცნობია.

ამავე თემაზე: