ლელოს თავმჯდომარე მამუკა ხაზარაძე აცხადებს, რომ თუ ქართული ოცნება ხელახალი არჩევნების დანიშვნას არ გეგმავს, ეს აუცილებლად უნდა განუცხადოს ელჩებს, წერილობითი სახით.

მისი თქმით, ქართული ოცნების განცხადება, რომ ხელახალი არჩევნების დანიშვნა არის გამორიცხული, არ არის არგუმენტი. ოცნების მენეჯმენტმა და გადაწყვეტილებებმა ქვეყანა უკიდურეს მდგომარეობამდე მიიყვანა.

"მათი გადაწყვეტილება არის ხაზგასმა იმისა, რომ ეს არჩევნები არის მიტაცებული. ეს იქნება არალეგიტიმური პარლამენტი. ისინი ვერანაირ საერთაშორისო მოლაპარაკებებს ვერ აწარმოებენ. ბიუჯეტი, რომელსაც თავად კერავენ, ჭრიან და თავადვე მიიღებენ, იქნება დამღუპველი. ასეთ დროს კი დაივიწყოს ყველამ, რომ ან ეკონომიკას ეშველება, ან პანდემიას, ან ჩვენი ქვეყანა რაიმე ფუნქციას შეიძენს, ამ დამოკიდებულების გამო, რაც დღეს ხდება. ამიტომ მათი განცხადებები ჩვენთვის არაფერს ნიშნავს. ამ დროს კი ოპოზიცია არის ერთიანი", —განაცხადა ხაზარაძემ.

მისივე განმარტებით, სწორედ აქ უნდა მივიღოთ გადაწყვეტილება — ან ქართული ოცნება განაგრძობს ამ ფორმით ქვეყნის მართვას და ყოველდღიურად უარეს შედეგს მივიღებთ, ან უნდა შეიცვალოს მდგომარეობა.

"ჩვენ მათ გაზაფხულზე შევთავაზეთ ანტიკრიზისული საბჭოს ჩამოყალიბება, სადაც პარტიების წარმომადგენლები ჩაერთვებიან. როდესაც ასეთ შეთავაზებზე მხოლოდ იმიტომ ამბობ უარს, რომ ვინც გამოსავალს გთავაზობს, შენი პარტიის წევრები არ არიან, როდესაც უნარი არ გაქვს ესაუბრო შენს მოქალაქეებს და საწინააღმდეგო აზრის მქონე პოლიტიკოსებს, საზოგადოებას და პარტიებს, ასეთ მმართველ ძალას არანაირი მორალური უფლება არ აქვს, რომ მართოს ქვეყანა. ის, რომ არ აპირებენ ხელახალი არჩევნების დანიშვნას, წერილობითი ფორმით დაუდასტურონ ელჩებს, დარჩნენ პარლამენტში მარტო, ჩვენ კი ვიდგებით იქ, სადაც ახლა ვდგავართ", — აღნიშნა ხაზარაძემ.