ქუთაისის ინტერვენციული მედიცინის ეროვნულ ცენტრში 24 წლის გოგო გარდაიცვალა. ინფორმაცია ამის შესახებ ტელეკომპანია ფორმულამ გაავრცელა.

როგორც გარდაცვლილის ოჯახის წევრები ამბობენ, პაციენტი სენაკიდან ხერხემლის ოპერაციისთვის გადმოიყვანეს. ოპერაციის დროს გული გაუჩერდა, რის შემდეგაც თავის ტვინის ოპერაცია დასჭირდა. თავის ტვინის ოპერაციის შემდეგ პაციენტი კომაში იყო და დღეს გარდაიცვალა. ოჯახი საქმის გამოძიებას და ექიმის ბრალეულობის დადგენას მოითხოვენ.

"გამოძიებას ვთხოვთ, სიმართლე დაადგინოს. ექიმი ამბობს, რომ 45 წუთის განმავლობაში გული ვერ აამუშავეს. მერე ინტერვიუში ამბობს, რომ სენაკიდან შემოიყვანეს პაციენტი, რომელსაც ჰქონდა თავის მძიმე დაზიანება, ხერხემლის მოტეხილობა, გულის ტრავმა. საიდან მოიტანა, არ ვიცით", — განაცხადა ოჯახის ახლობელმა.

ოჯახის ახლობლის თქმით, პაციენტი კლინიკაში ხერხემლის მოტეხილობით შეიყვანეს და სხვა ჩამოთვლილი დაზიანებები კლინიკაში შეყვანის შემდეგ მიიღო.

"აღნიშნულ საკითხს სწავლობს ფარმაცევტული და სამედიცინო საქმიანობის რეგულირების სააგენტო. რამდენადაც ჩემთვის ცნობილია, გამოძიება დაწყებულია და დასკვნა უნდა დადოს რეგულირების სააგენტომ და ექსპერტიზამ. ამ ეტაპზე შეუძლებელია, ვიმსჯელოთ, რა მოხდა და არის თუ არა ვინმეს ბრალეულობა", — განაცხადა კლინიკის იურისტმა.

გარდაცვლილი პაციენტის ოჯახის წევრები პრემიერმინისტრ გახარიასგან მოითხოვენ დახმარებას.