სიკვდილიანობის მაჩვენებლით კორონავირუსი გულის იშემიური დაავადების შემდეგ მეორე ადგილზეა. ამის შესახებ დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელმა, ამირან გამყრელიძემ უწყებათაშორისი საკოორდინაციო საბჭოს სხდომის შემდეგ გამართულ ბრიფინგზე განაცხადა.

"ბოლო ორი კვირის განმავლობაში კორონავირუსით სიკვდილიანობის მაჩვენებელი ევროპაში გაიზარდა და გულის იშემიური დაავადების შემდეგ მეორე ადგილზე გავიდა", — განაცხადა ამირან გამყრელიძემ.

მისი თქმით, პირველ ადგილზე სიკვდილიანობის მაჩვენებელში ყოველთვის არის გულ-სისხლძარღთა დაავადებები, მერე მოდის კიბო, შემდეგ ფილტვების ქრონიკული დაავადებები და ასე შემდეგ. დღეს კი მეორე ადგილზე უკვე კორონავირუსული დაავადებაა.

30 ნოემბრის მონაცემებით, ბოლო 24 საათის განმავლობაში კორონავირუსის 3 216 ახალი შემთხვევა დადასტურდა. გამოჯანმრთელდა — 3 937, ხოლო გარდაიცვალა — 37.