ვიცე-პრემიერმა და ინფრასტრუქტურის მინისტრმა, მაია ცქიტიშვილმა ოპოზიციური პარტიების პარლამენტის ბოიკოტზე თქვა, რომ თუკი ისინი საპარლამენტო მანდატებზე უარს იტყვიან, სახელმწიფო ბიუჯეტიდან ვერ დაფინანსდებიან. მისი თქმით, ზოგადად, სახელმწიფო ბიუჯეტიდან პოლიტიკურ პარტიებს იმის გამო აფინანსებენ, რომ მათ პასუხისმგებლობა მოქალაქეების წინაშე აიღონ და პოლიტიკურ ცხოვრებაში მონაწილეობა მიიღონ.

"შეასრულონ დაკვეთა, რასაც მათ მოქალაქე აძლევს და შემდგომში რა დაფინანსებასაც ეს მოქალაქე იხდის თავისი ჯიბიდან. ასე რომ, ყველა დაფინასება არის მიბმული პასუხისმგებლობაზე. არჩევნებში მონაწილეობა, პოლიტიკურ პარტიად საკუთარი თავის პოზიციონირება არის, პირველ რიგში, პასუხისმგებლობა ამომრჩევლის წინაშე. აქედან გამომდინარე, პასუხისმგებლობა გამოიხატება იმ პროცესში მონაწილეობაში, რასაც გულისხმობს, თუნდაც ჩვენი საპარლამენტო დემოკრატია და შესაბამისად, ყველა პოლიტიკურმა პარტიამ უნდა აიღოს ის პასუხისმგებლობა და სათანადოდ იყოს წარმოდგენილი საქართველოს პარლამენტში, ისე როგორც ეს ამომრჩეველმა გადაწყვიტა. შესაბამისად, როდესაც ჩვენ ვსაუბრობთ პასუხისმგებლობაზე ან დაფინასებაზე, დაფინანსება ყოველთვის მოჰყვება ამა თუ იმ საქმის კეთებას და ამა თუ იმ პასუხისმგებლობის აღებას", — განაცხადა ცქიტიშვილმა.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და ბოიკოტი გამოუცხადეს არჩევნების მეორე ტურსაც, რომელიც 21 ნოემბერს ჩატარდა. მასში არცერთი ოპოზიციური პარტია მონაწილეობდა. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი იყო, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

მეორე ტური მიმდინარეობდა იმ ვითარების ფონზეც, რომ პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

აშშ-ის და ევროკავშირის საელჩო ოპოზიციას მოუწოდებენ, პარლამენტში შევიდნენ, ვინაიდან მათთვის ერთპარტიული პარლამენტი მიუღებელია.