ჯანდაცვის მინისტრის ეკატერინე ტიკარაძის თქმით, გეგმიური ოპერაციები პირველ მარტამდე გადაიდება. მან ისიც აღნიშნა, რომ ეს ოპერაციები, რადგან არის დაგეგმილი, მათი გადადება ნაკლებად საზიანო იქნება. ამის შესახებ მან იმედის ეთერში ისაუბრა.

ტიკარაძის თქმით, გეგმიური ოპერაციების გადადება ბიუჯეტს არ უკავშირდება.

"ჩვენ გვქონდა არაერთი შემთხვევა, ადამიანი რომელიც არ იყო კოვიდინფიცირებული, მიმართა კლინიკას ჩაიტარა კონკრეტული ოპერაცია და ოპერაციის შემდეგ მას დაუდასტურდა კოვიდინფექცია, აქედან გამომდინარე, მივიღეთ გადაწყვეტილება, რომ ისევ პაციენტების უსაფრთხოების მიზნით, გეგმიური ოპერაციები შევზღუდოთ და დაყოვნება გავზარდოთ პირველ მარტამდე", — განაცხადა ტიკარაძემ იმედის ეთერში.

23 ნოემბერს საქართველოში კორონავირუსის 3 958 ახალი შემთხვევა დადასტურდა, გამოჯანმრთელდა — 3 531, გარდაიცვალა — 36.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 108 690-ს. ჯამში გამოჯანმრთელებულთა რაოდენობა გაიზარდა 89 170-მდე. 2020 წლის 26 თებერვლიდან დღემდე სულ გვაქვს 1 012 გარდაცვალების შემთხვევა.