ინტერნეტში წერეთელზე მიკროსაფინანსო ორგანიზაციაზე სავარაუდო თავდამსხმელის კადრები ვრცელდება. ამ ეტაპზე შინაგან საქმეთა სამინისტროს არ ადასტურებს, რომ თავდამსხმელი ის არის.

გავრცელებულ კადრებში ჩანს, რომ მძევლები დაშავებულები არ არიან და სავარაუდო თავდამსხმელი მათ მიმართ აგრესიას არ იჩენს. არ ჩანს აქვს თუ არა სავარაუდო თავდამსხმელს ცეცხლსასროლი იარაღი. სავარაუდოდ, მას ხელში ყუმბარა უჭირავს, თუმცა ამ ინფორმაციის დადასტურება ვერ ხერხდება.

სავარაუდო თავდამსხმელი მძევლებს ეუბნება, რომ პირდაპირი ეთერი ჩართონ, რათა მედიებმა კადრები ნახონ და გააშუქონ. ის მოითხოვს, პარლამენტის დეპუტატები და ამ არჩევნებში მონაწილე პოლიტიკოსები შეიკრიბონ და 3 კანონი მიიღონ: აზარტული თამაშების აკრძალვა, სესხის პროცენტად მაქსიმუმ 7%-ის განსაზღვრა და წამლების ფასის შემცირება.

გავრცელებულ კადრებში ის არ ასახელებს, რა შემთხვევაში გაათავისუფლებს მძევლებს და არც მომლაპარაკებელს ითხოვს.

თბილისის პოლიციის უფროსის, ვაჟა სირაძის განცხადებით, წერეთელზე მიკროსაფინანსო ორგანიზაციაში შეჭრილია 1 პირი და მას 9 მძევალი ყავს. ამის შესახებ მან ადგილზე ჟურნალისტებთან განაცხადა.

"წერეთლის გამზირზე მოხდა შეიარაღებული თავდასხმა ერთ-ერთ მიკროსაფინანსო ორგანიზაციაში. ადგილზე იმყოფება პოლიციური ჯგუფები. ჩვენი ინფორმაციით, მიკროსაფინანსოში არის 9 მძევალი და 1 შეიარაღებული პირი", — განაცხადა მან.

სირაძემ მოუწოდა ჟურნალისტებს, შეწყვიტონ პირდაპირი ჩართვა წერეთლის გამზირიდან, სადაც მიკროსაფინანსო ორგანიზაციაში თავდამსხმელია შეჭრილი. მისი განმარტებით ეს საფრთხეს უქმნის მძევლებსა და სამართალდამცავებს.

შინაგან საქმეთა სამინისტროს განცხადებით, მომხდარზე გამოძიება სისხლის სამართლის სამართლის კოდექსის 236-ე და 179-ე მუხლებით დაიწყო, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას და ყაჩაღობას გულისხმობს.

გავრცელებული ინფორმაციით, თავდამსხმელს აქვს ხელყუმბარა. როგორც სირაძემ ჟურნალისტებს განუცხადა, ამის შესახებ ინფორმაცია არ აქვს.

მიკროსაფინანსო ორგანიზაცია MBC-ში, სადაც თავდამსხმელია შეჭრილი, აცხადებენ, რომ შესაძლებლობების ფარგლებში ყველაფერს გააკეთებენ, პროცესის მშვიდობიანად დასასრულებლად.