თბილისის პოლიციის უფროსმა, ვაჟა სირაძემ მოუწოდა ჟურნალისტებს, შეწყვიტონ პირდაპირი ჩართვა წერეთლის გამზირიდან, სადაც მიკროსაფინანსო ორგანიზაციაში თავდამსხმელია შეჭრილი. მისი განმარტებით ეს საფრთხეს უქმნის მძევლებსა და სამართალდამცავებს.

"მინდა გთხოვოთ და მოგიწოდოთ მედიასაშუალებებს, რომ შეწყვიტოთ ლაივსაშუალებებით პირდაპირი ჩართვა, ვინაიდან საფრთხეს უქმნის ეს, როგორც მოქალაქეების, ასევე სამართალდამცავი ორგანოების წარმომადგენლებს. თავი შევიკავოთ დაუზუსტებელი ინფორმაციის გავრცელებისგან", — განაცხადა მან და აღნიშნა, რომ ინფორმაციას ეტაპობრივად გაავრცელებენ.

სირაძის განცხადებით, მიკროსაფინანსოში შეჭრილია 1 პირი და მას 9 მძევალი ყავს.

"წერეთლის გამზირზე მოხდა შეიარაღებული თავდასხმა ერთ-ერთ მიკროსაფინანსო ორგანიზაციაში. ადგილზე იმყოფება პოლიციური ჯგუფები. ჩვენი ინფორმაციით, მიკროსაფინანსოში არის 9 მძევალი და 1 შეიარაღებული პირი", — განაცხადა მან.

შინაგან საქმეთა სამინისტროს განცხადებით, მომხდარზე გამოძიება სისხლის სამართლის სამართლის კოდექსის 236-ე და 179-ე მუხლებით დაიწყო, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას და ყაჩაღობას გულისხმობს.

გავრცელებული ინფორმაციით, თავდამსხმელს აქვს ხელყუმბარა. როგორც სირაძემ ჟურნალისტებს განუცხადა, ამის შესახებ ინფორმაცია არ აქვს.

მიკროსაფინანსო ორგანიზაცია MBC-ში, სადაც თავდამსხმელია შეჭრილი, აცხადებენ, რომ შესაძლებლობების ფარგლებში ყველაფერს გააკეთებენ, პროცესის მშვიდობიანად დასასრულებლად.