სააპელაციო სასამართლომ არჩევნებთან დაკავშირებით ოპოზიციური პარტიების საჩივრები, რომელიც შემაჯამებელი ოქმების ბათილად ცნობას ეხებოდა, არ დააკმაყოფილა. როგორც ევროპული საქართველოს წევრი, ოთარ კახიძე ამბობს, ცენტრალურმა საარჩევნო კომისიამ "წინასწარ" განჭვრიტა, რას იზამდა საქალაქო და სააპელაციო სასამართლოები.

"სამწუხაროდ, სახელმწიფო ინსტიტუტები ჩვენთან, პოლიტიკურ მითითებებს ემორჩილებიან. დავის ასე დასრულება ევროპული საქართველოსთვის სიურპრიზი არ ყოფილა, ჩვენ ყველა სამართლებრივი გზა გავიარეთ, ეს გადაწყვეტილება აღარ საჩივრდება. რა თქმა უნდა, კონსტიტუციის ფარგლებში მივმართავთ მშვიდობიან და მტკიცე პროტესტს, ბოიკოტით დაწყებული, მშვიდობიანი ქუჩის აქციებით გაგრძელებული. ეს არის გზა, რომლის გარდა ივანიშვილმა სხვა არ დატოვა", — განაცხადა კახიძემ.

რაც შეეხება, ლეიბორისტული პარტიის ადვოკატის, მარი ცუცქირიძის განცხადებით, ისინი ამას ადამიანის უფლებათა ევროპულ სასამართლოში გაასაჩივრებენ, რადგან მისი თქმით, ეს "სამარცხვინო" გადაწყვეტილება იყო.

"ჩვენ ყველა იმ ვიდეო-აუდიო მასალას, თუ რა სამარცხვინო გაყალბებები ხდებოდა უბნებზე, აუცილებლად წარვუდგენთ ადამიანს უფლებათა ევროპულ სასამართლოს", — აღნიშნა ადვოკატმა.

16 ნოემბერს საქალაქო სასამართლოში არჩევნებთან დაკავშირებით ოპოზიციური პარტიების სარჩელების განხილვა მიმდინარეობდა. შემაჯამებელი ოქმების ბათილად ცნობას მოითხოვდნენ პარტიები: ენმ-ძალა ერთობაშია, ევროპული საქართველო, დემოკრატიული მოძრაობა —ერთიანი საქართველო, ლეიბორისტული პარტია. თუმცა არცერთი მათგანი სასამართლომ არ დააკმაყოფილა. პარტიებმა ეს გადაწყვეტილება სააპელაციო სასამართლოშიც გაასაჩივრეს.

ცენტრალურ საარჩევნო კომისიაში არჩევნების შემაჯამებელი ოქმი 13 ნოემბერს მიიღეს. ცესკომ ოპოზიციის არც ერთი საჩივარი არ დააკმაყოფილა. სხდომა ხმაურის ფონზე მიმდინარეობდა, რადგან ოპოზიციის წარმომადგენლები აცხადებდნენ, რომ ცესკო შემაჯამებელ ოქმს უკანონოდ და დაჩქარებული ვადებით იღებდა.