ბათუმში 62 წლის ექიმი კორონავირუსით გარდაიცვალა. ის ბათუმის რესპუბლიკურ საავადმყოფოში მკურნალობდა. ექიმის გია კიკაბიძის თქმით, გარდაცვლილი დღეს უნდა გაწერილიყო სახლში.

"სამწუხაროდ მოხდა ასეთი ფაქტი, გამოგვაკლდა ძალიან კარგი ექიმი. ის ამ უხილავ მტერთან ბრძოლაში პირველი დღიდანვე იყო ჩართული. რვა დღეს განმავლობაში ჩვენთან მკურნალობდა თერაპიულ ნაწილში, მისი მდგომარეობა იყო სავსებით სტაბილური. თვითონაც ექიმი იყო და აკონტროლებდა საკუთარ თავს. მკურნალობის კურსი თითქმის დამთავრებული ჰქონდა, ანალიზები ნორმაში ჰქონდა, მაგრამ გუშინ ღამით უეცრად დამძიმდა და გულის გაჩერება დაფიქსირდა. 62 წლის იყო, ჰქონდა თანმხლები დაავადებები, მაგრამ ახლა ამაზე ლაპარაკი არაეთიკურად მიმაჩნია", — განაცხადა გია კიკაბიძემ.

დღეის მდგომარეობით, ბოლო 24 საათის განმავლობაში გამოვლენილია ინფიცირების 3 443 ახალი დადასტურებული შემთხვევა. პირველი ინფიცირების შემთხვევიდან დღემდე ქვეყანაში გამოვლენილი კოვიდ-19-ის დადასტურებული შემთხვევების საერთო რაოდენობა შეადგენს 89 395.