იტალიის პოლიციამ პაციენტისთვის დონორი თირკმლის მისატანად Lamborghini Huracan-ით 487 კილომეტრი (303 მილი) დაფარა. გზას, ჩვეულებრივ, ექვსი საათი მაინც სჭირდება, თუმცა პოლიციის მანქანის პრივილეგიებისა და მისი წარმოუდგენელი სიჩქარის წყალობით თირკმელი დანიშნულების ადგილას სულ რაღაც ორ საათში მიიტანეს. მეტიც, საავადმყოფოებს შორის მანქანის საშუალო სიჩქარე 233 კმ/სთ (145 მილი/სთ) იყო.

ფოტო: Polizia di Stato/Twitter

ავტომობილი Lamborghini Huracan იტალიის პოლიციამ 2017 წელს შეიძინა და ინდივიდუალურად გადააკეთა სწორედ ასეთი ტიპის საქმეებისთვის. ავტომობილს უკვე ჰქონდა მაცივარი-საბარგული და დეფიბრილატორი, რის გამოც ის იდეალური იყო ამ საქმისთვის, რომელსაც, როგორც წესი, ვერტმფრენი ასრულებს ხოლმე. მიუხედავად ამისა, პოლიციას არ განუცხადებია, რატომ გახდა საჭირო ვერტმფრენის ალტერნატიული ტრანსპორტის გამოყენება. პოლიციამ მოგვიანებით Twitter-ზე დაპოსტა და მადლობა გადაუხადა ყველას, ვინც ამ უჩვეულო მეთოდით თირკმლის ტრანსპორტირება შესაძლებელი გახადა.

ეს მაღალსიჩქარიანი მოგზაურობა რომიდან დაიწყო და პადუაში, გემელის უნივერსიტეტის საავადმყოფოში დასრულდა. დაპოსტილ ვიდეოში ეს მოგზაურობა საკმაოდ მშვიდადაა აღწერილი, თუმცა მძღოლი, ალბათ, ავტომობილის საშუალო სიჩქარის გათვალისწინებით, საჭესთან არც ისე მშვიდად გრძნობდა თავს:

ჯერჯერობით უცნობია, რატომ დასჭირდა პოლიციას ვერტმფრენის გამოყენების სტანდარტული პრაქტიკიდან გადახვევა. შესაძლოა, ამ მოგზაურობის შესახებ დამატებითი ინფორმაცია მოგვიანებით გახდეს ცნობილი — იქნებ, უბრალოდ, ვიღაცას იმის გამართლება სურდა, თუ რატომ შეიძინეს საერთოდ Lamborghini Huracan.