ერთიანი ნაციონალური მოძრაობა გაზპრომთან მოლაპარაკებების შეჩერებას ითხოვს. აღნიშნულის შესახებ დღეს გამართულ ბრიფინგზე პარტიის ერთ-ერთმა ლიდერმა რომან გოცირიძემ განაცხადა:

"ეს არის ქვეყნის ეროვნული ინტერესების საწინააღმდეგო ქმედება და ფაქტობრივად, საქართველოს ხელისუფლებამ რუსეთის წინაშე კაპიტულაცია მოახდინა. იმ შემთხვევაშიც კი, როდესაც ჩვენ გვაქვს სერიოზული ბერკეტები, სადაც გვაქვს უპირატესობა, როდესაც ასეთ დათმობაზე მიდიხარ, წარმოგვიდგენია რა მოხდება უფრო მძიმე მოლაპარაკების შემთხვევაში. პოლიტიკურად ეს ხელშეკრულება დამაზარალებელია ქვეყნის ეროვნული ინტერესებისთვის, ხოლო ეკონომიკურად წამგებიანი, ჩვენ წელიწადში ვკარგავთ დაახლოებით 20 მილიონ დოლარს".

გოცირიძემ საზოგადოებას ის რეზოლუცია გააცნო, რომელიც ენმ-მ შეიმუშავა და განაცხადა, რომ გაზპრომთან მოლაპარაკება შესაძლოა დამოკიდებული იყოს კორუფციასთან ან ცალკეული პირების დაინტერესებასთან.

ენერგეტიკის მინისტრმა კახი კალაძემ გუშინ განაცხადა, რომ მთავრობამ გაზპრომთან სწორი და რაციონალური ნაბიჯები გადადგა.