ადვოკატ ბექა ბასილაიას თბილისის საქალაქო სასამართლოში ქართული ოცნების აღმასრულებელი მდივნის ირაკლი კობახიძის წინააღმდეგ სარჩელი შეაქვს. ადვოკატის განმარტებით, ცრუ ინფორმაციის გავრცელებისთვის, კობახიძისგან ბოდიშის მოხდას და მორალური ზიანის ანაზღაურებისთვის სიმბოლურად 41 ლარის დაკისრებას ითხოვს.

საქმე ეხება ირაკლი კობახიძის განცხადებებს, რომლის თანახმადაც, ოპოზიცია არჩევნების ქვეყანაში დესტაბილიზაციის მოწყობას აპირებდა.

"ირაკლი კობახიძის განცხადების საფუძველზე, სუს-ში მიმდინარეობს გამოძიება სრულიად აბსურდულ საქმეზე და პატიოსან ადამიანებს, ომის ვეტერანებს, ტაქსის მძღოლებს, მოვაჭრეებს დაატარებენ ხან სუს-ში, ხან სასამართლოში და მათ მიმართ გაისმის ბრალდებები, თითქოს მათი მხრიდან ადგილი ჰქონდა დესტაბილიზაციის და არეულობის მცდელობას", — განაცხადა ბასილაიამ.

როგორც ბასილაია ამბობს, სარჩელი კოლექტიურია და ირაკლი კობახიძეს მოეთხოვება უარყოს გავრცელებული მცდარი ინფორმაცია და ამ ხალხის წინაშე ბოდიში მოიხადოს.

არჩევნებდამდე ერთი დღით ადრე, 30 ოქტომბერს კობახიძე ამტკიცებდა, რომ არჩევნების დღეს ოპოზიციას წინასაარჩევნოდ ხელკეტებითა და ელექტროშოკებით აღჭურვილი ეკიპაჟები ჰყავდათ მობილიზებული. კობახიძემ ბრიფინგზე განაცხადა, რომ მათ ეს ინფორმაცია სამართალდამცავ ორგანიზაციებს საჯაროდ მიაწოდეს.

30 ოქტომბერს, შინაგან საქმეთა სამინისტრომ ირაკლი კობახიძის ბრალდების საფუძველზე შესწავლა დაიწყო. ირაკლი კობახიძე სახელმწიფო უსაფრთხოების სამსახურში გამოკითხვაზეც იმყოფებოდა.

გამოკითხვიდან გამოსვლის შემდეგ კობახიძემ განაცხადა, რომ რომ გამოძიებას დაუსახელა ინფორმაციის წყარო და მიხეილ სააკაშვილის ე.წ. "რევოლუციური სცენარის" შინაარსი.