პარტია მოქალაქეების ლიდერი, ალეკო ელისაშვილი ამბობს, რომ ქართული ოცნების წევრების, კახა კალაძისა და მამუკა მდინარაძის განცხადებები მეტყველებს იმაზე, რომ მათ მოლაპარაკებების ჩაშლა სურთ. მისივე თქმით, პროცესი არ დასრულებულა და ჯერ კიდევ მიმდინარეობს.

"თან ყვებიან ტყუილს, თითქოს ჩვენ რაღაცაზე უარი ვთქვით. არაფერზე უარი არ გვაქვს ნათქვამი, რადგან მოლაპარაკებების პროცესი მიმდინარეობდა. რამეზე ჩვენ რომ კატეგორიული უარი გვეთქვა, მოლაპარაკება დასრულდებოდა უკვე", — განაცხადა ელისაშვილმა.

პარლამენტის წინ გამართული აქციის პარალელურად ქართული ოცნების გენერალურმა მდივანმა, კახა კალაძემ განაცხადა, რომ მმართველ პარტიაში ხელახალი არჩევნების ჩატარების საკითხი არც განიხილება. მისივე თქმით, აშშ-ს ელჩთან მოლაპარაკებების დროს ოპოზიციამ უარი თქვა ხმების გადათვლაზე და ვიდეოჩანაწერების შემოწმებაზე, რომელიც ე.წ. კარუსელების შესახებ სპეკულაციებს გააქრობდა. მსგავსი შინაარსის განცხადება მმართველი გუნდის წევრმა, მამუკა მდინარაძემაც გააკეთა.

ამავე დროს, ლეიბორისტული პარტიის ლიდერმა, შალვა ნათელაშვილმა თქვა, რომ ოპოზიციამ ელჩებთან შეხვედრისას ხმების გადათვლაზე უარი თქვეს.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

მმართველ პარტიასა და ოპოზიციას შორის დიალოგის დაწყების შუამავლები ამჯერადაც ელჩები აღმოჩნდნენ. შეხვედრები აშშ-ს ელჩის, კელი დეგნანის რეზიდენციაში გაიმართა, რომელსაც ევროკავშირის ელჩი, კარლ ჰარცელიც ესწრება.