ევროპული საქართველოს ერთ-ერთმა ლიდერმა, დავით ბაქრაძემ განაცხადა, რომ ცესკოს წუხანდელმა გადაწყვეტილებამ დაავიწროვა აშშ-ს ელცთან, კელი დეგნანთან დღევანდელი შეხვედრის თემები და ამიტომ მოლაპარაკების მაგიდაზე დარჩა მხოლოდ ერთადერთი საკითხი — ოპოზიციის შეთავაზება ახალი არჩევნების შესახებ.

"ის უკანონო და სამარცხვინოა გადაწყვეტილება, რომელიც ცესკოში მიიღეს და რომლითაც ოპოზიციას წაართვეს სასამართლოში გასაჩივრების უფლება. ცესკოს ეს გადაწყვეტილება იყო ფაქტორი, რომელმაც ძალიან დაავიწროვა მოლაპარაკების თემა, ამიტომ მოლაპარაკების მაგიდაზე დარჩა ერთადერთი საკითხი — ოპოზიციის შეთავაზება ახალი არჩევნების შესახებ. ჯერჯერობით პოზიციები არის ერთმანეთისგან დაშორებული, მაგრამ შევთანხმდით, რომ დიალოგი და პროცესი გაგრძელდება. ამ დიალოგის ამოცანა გახლავთ, რომ ძალიან დაშორებული პოზიციებიდან ნაბიჯ-ნაბიჯ მივიდეთ იმ კომპრომისამდე, რომელიც საჭიროა ამ ქვეყანაში სტაბილურობისთვის. ამას სჭირდება ახალი არჩევნები, ეს არის განხილვის თემა. უახლოეს დღეებში ველით ახალ შეხვედრას", — განაცხადა დავით ბაქრაძემ.

13 ნოემბერს მას შემდეგ, რაც ოპოზიციის არცერთი საჩივარი არ დააკმაყოფილა, ცესკომ შედეგები შეაჯამა და მეორე ტური დანიშნა, რომელიც 21 ნოემბერს გაიმართება. ცესკოს სხდომამ, რომელზეც ოპოზიციური პარტიების მიერ წარდგენილი საჩივრები განიხილებოდა, ხმაურით ჩაიარა. საბოლოოდ კი, ცესკომ ოპოზიციის არცერთი საჩივარი არ დააკმაყოფილა. ოპოზიციას გასაჩივრებისთვის 1 დღე აქვს.

დღეს, 14 ნოემბერს ოპოზიციასა და მმართველ გუნდს შორის მოლაპარაკებების მეორე რაუნდი გაიმართა. შეხვედრა კვლავ აშშ-ს ელჩის, კელი დეგნანის რეზიდენციაში ჩატარდა და მას ევროკავშირის ელჩი, კარლ ჰარცელიც დაესწრო. პირველი შეხვედრის მსგავსად, ახლაც მოლაპარაკებებში ბარიერგადალახული ოპოზიციური პარტიის ლიდერები და პარლამენტის თავმჯდომარე, არჩილ თალაკვაძე ჩაერთნენ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე14 ნოემბერსაა დაგეგმილი.

ამავე თემაზე: