ნაციონალური მოძრაობის წევრი, ხატია დეკანოიძე აცხადებს, რომ არსებული ცესკოსა და საუბნო კომისიების პირობებში ხმების გადათვლა ობიექტურ სურათს ვერ დადებს. როგორც მან ფორმულას ეთერში აღნიშნა, არჩევნების დროს ბიულეტენები გაქრა, ზოგიერთი ოქმი ჩასწორდა და სხვა შემთხვევებში ძალდატანება და მუქარა დაფიქსირდა.

"მე ვფიქრობ, რომ გადათვლა არ იქნება ის მექანიზმი ამ ცენტრალური საარჩევნო კომისიის, იმ საუბნო საარჩევნო კომისიების პირობებში, რომ ჩვენ ობიექტური სურათი მივიღოთ. ყველა ხმა არის მნიშვნელოვანი, ყველას ხმას სჭირდება გაფრთხილება. წარმოუდგენლად მიმაჩნია რაიმე სახის ახალი ფორმულა მოვიგონოთ, რომ დარწმუნებული ვიყო, რომ იმ ყუთებში ზუსტად იმდენი ხმა დევს, რაც ჩვენმა მოქალაქეებმა დააფიქსირეს", — თქვა დეკანოიძემ.

31 ოქტომბრის საპარლამენტო არჩევნების შედეგებს ოპოზიცია არ აღიარებს. ბარიერგადალახულმა რვავე პარტიამ პარლამენტში შესვლაზე უარი განაცხადა. გარდა ამისა, ისინი მეორე ტურებში მონაწილეობაზეც უარს ამბობენ.

პატრიოტთა ალიანსის გარდა, პარტიები ერთობლივ საპროტესტო აქციებს აწყობენ. ისინი მოითხოვენ, რომ ცენტრალური საარჩევნო კომისიის ახალი ადმინისტრაციის პირობებში ხელახალი არჩევნები ჩატარდეს.

ოპოზიციის ბრალდებებს უარყოფენ ქართულ ოცნებაში. როგორც მმართველ პარტიაში აცხადებენ, ისინი მზად არიან დიალოგისთვის, თუ ოპოზიცია არჩევნების შედეგებს პატივს სცემს.