საქართველოს პრეზიდენტი, სალომე ზურაბიშვილი ცესკოსთან აქციის დაშლას ამ დრომდე არ გამოხმაურებია. სამართალდამცავებმა წყლის ჭავლის გამოყენებით მომიტინგეების დაშლა საღამოს ათი საათისთვის დაიწყო და ღამის საათებში კვლავ გაგრძელდა.

ამ ხნის განმავლობაში არაერთი განცხადება გააკეთეს ქართული ოცნების ლიდერებმა, არასამთავრობო ორგანიზაციებმა და სახალხო დამცველმა, თუმცა პრეზიდენტს თითქმის 14 საათის შემდეგ გუშინდელი ღამე კვლავ არ შეუფასებია. მისი ბოლო პოსტები ფეისბუქსა და ტვიტერზე აშშ-ს საპრეზიდენტო არჩევნებს ეხება.

ეს პირველი შემთხვევა არაა, როცა პრეზიდენტი თავს არიდებს ან დაგვიანებით ავრცელებს განცხადებას ქვეყანაში მიმდინარე მნიშვნელოვან მოვლენაზე. 2018 წელს საპრეზიდენტო არჩევნების პირველი ტურის შემდეგ მას მოსახლეობისთვის არ მიუმართავს, ხოლო ჟურნალისტების კითხვას "როცა დავაპირებ, გეტყვით" უპასუხა. საბოლოოდ, მან ბრიფინგი მეორე დღეს საღამოს მოაწყო. გარდა ამისა, 2019 წელს რუსთაველზე ფართომასშტაბიანი აქციის პარალელურად პრეზიდენტი, სალობიე ბიაში ვახშმობდა.

სპეცრაზმმა აქცია გაფრთხილების გარეშე დაშალა — რა ხდებოდა ცესკოსთან

8 ნოემბერს ოპოზიციამ პარლამენტთან საპროტესტო აქცია გამართა, რომელზეც მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავისუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობამ იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღმდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. რამდენიმე საათში სპეცრაზმმა წყლის ჭავლი ისევ გამოიყენა და ამჯერად უფრო ხანგრძლივად, ვიდრე მანამდე.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.

გაიგეთ მეტი მომხდარის პოლიტიკურ შეფასებებზე: