საპროტესტო აქციიდან სტრატეგია აღმაშენებლის ლიდერმა, გიორგი ვაშაძემ ქართული ოცნების ამომრჩევლებს მიმართა:

"მე ვიცი, რომ ახლა ძალიან ბევრი ადამიანი გვიყურებს, ვინც შეიძლება ქართულ ოცნებას მისცა ხმა. მე მინდა, ამ ხალხს ვუთხრა: ძვირფასებო, ჩვენ თქვენი ნების გამოხატვასაც ვცემთ პატივს, მაგრამ თქვენს ხელისუფლებას იქნებ უთხრათ, რომ ამ მრავალი ათასი ადამიანის ნების გამოხატვას სცეს პატივი, აღიაროს მარცხი და დანიშნოს ხელახალი არჩევნები", — განაცხადა მან.

ვაშაძემ აღნიშნა ისიც, რომ დამოუკიდებლობის მანძილზე ქართველებს ხშირად უწევთ ბრძოლა რუსთაველზე და ქუჩის პროტესტებით უწევთ მიაღწიონ შედეგს.

"ბევრი სვამს კითხვას, რატომ ვართ აქ შეკრებილები. მეგობრებო, ჩვენ ძალიან მარტივ რაღაცას ვითხოვთ, ჩვენ ვითხოვთ ჩვენი საარჩევნო ხმის უფლების დაცვას, მეტი არაფერი. დემოკრატია ეს არის", — განაცხადა ვაშაძემ.

ამ წუთებში პარლამენტის წინ წარსულში ერთმანეთთან დაპირისპირებული ოპოზიციური პარტიები საერთო აქციას მართავენ და არჩევნების შედეგებს აპროტესტებენ.

ოპოზიციური პარტიები არჩევნების შედეგებს არ აღიარებენ და არალეგიტიმურად ცნობენ. ყველა ბარიერგადალახულმა პარტიამ უარი თქვა მეორე ტურში მონაწილეობასა და პარტლამენტის მანდატებზე.

არჩევნების შემდეგ, როცა ოპოზიციამ აქციები დაანონსა, სამთავრობო გუნდი და საკოორდინაციო საბჭოს წევრები უფრო მკაცრად აცხადებენ, რომ აქციები ვირუსის გავრცელების საფრთხეს შეიცავს და მოუწოდებენ მოქალაქეებსა და პოლიტიკურ ლიდერებს დაიცვან წესები.