ეუთოს საპარლამენტო ასამბლეის პრეზიდენტი, ევროპული საქართველოს ერთ-ერთი ლიდერი, გიგი წერეთელი, ოდირის საარჩევნო სადამკვირვებლო მისიის ხელმძღვანელს, ჯილიან სტირკს შეხვდა.

წერეთლის თქმით, შეხვედრაზე მან, როგორც ეუთოს საპარლამენტო ასამბლეის პრეზიდენტმა, ოდირის მისიის ხელმძღვანელს ესაუბრა 31 ოქტომბრის არჩევნებსა და ეუთოს დასკვნაზე.

წერეთელი ამბობს, რომ დასკვნაში პოზიტიურადაა შეფასებული კორონაპანდემიის დროს ჩატარებული არჩევნები, თუმცა, მასში საუბარია იმ საარჩევნო მანიპულაციებზე, რომელმაც ნეგატიური გავლენა იქონია საარჩევნო პროცესზე.

"გვქონდა საუბარი დღეს შექმნილ ვითარებასთან დაკავშირებით და ვისაუბრეთ იმ დასკვანზეც, რომელიც ეუთომ დადო საქართველოს არჩევნებთან დაკავშირებით. წინასწარ დასკვნაში საკმაოდ მკაფიოდ იყო ნათქვამი ის, რაც მიჩნეული იყო ზოგადად დადებით მომენტად და იყო ასევე მთელი რიგი ჩამონათვალი იმ უარყოფითი და ნეგატიური მომენტებისა, რამაც საბოლოოდ გამოიწვია ყველა ის პრობლემა რაც დღეს ჩვენ გვაქვს. ეს არის როგორც საარჩევნო ადმინისტრაციების საკითხი, ასევე ადმინისტრაციული რესურსის გამოყენება. სამწუხაროდ, ჩვენ ვხედავთ, რომ ძალიან ბევრი დარღვევა გამოვლინდა, რისი ცნობებიც ნელ ნელა შემოდის.

ვნახოთ, როგორ იქნება ასახული ეს იმ საბოლოო დასკვანში, რომელიც გამოქვეყნედება დაახლოებით ერთი თვის განმავლობაში. მე იმედი მაქვს, რომ ყველა ის ობიექტური და დასაბუთებული საჩივარი დარღვევებთან დაკავშირებით იქნება სამომავლოდ გათვალისწინებული", — განაცხადა წერეთელმა.