ცენტრალური საარჩევნო კომისიის ინფორმაციით, საოლქო საარჩევნო კომისიებში კენჭისყრის დღეს და შემდგომ დღეებში დაახლოებით 1800 საჩივარი შევიდა. როგორც ცესკოში ამბობენ, კენჭისყრის დღესთან დაკავშირებული საჩივრები, ძირითადად, პროცედურულ საკითხებს შეეხებოდა, ხოლო, კენჭისყრის დღის შემდგომი საჩივრები — საუბნო საარჩევნო კომისიების შედეგებსა და კენჭისყრის შედეგების შემაჯამებელი ოქმების კანონიერებას.

"აღსანიშნავია, რომ საჩივრების უმეტესობა საოლქო კომისიებში პროცედურების დარღვევით იყო წარდგენილი. განხილვის შედეგების შესახებ ინფორმაცია დეტალურად მუშავდება და შემდგომში იქნება წარმოდგენილი", — ვკითხულობთ ცესკოს განცხადებაში.

ცესკოში ამბობენ, რომ მცირე გამონაკლისების გარდა, შემაჯამებელ ოქმებზე უბანზე მყოფი ყველა კომისიის წევრის ხელმოწერაა. მათივე ინფორმაციით, გაბათილდა პროპორციული სიის ბიულეტენების 3,27%, ხოლო მაჟორიტარულის — 4,15%. ცესკოში განმარტავენ, რომ 2016 წლის საპარლამენტო არჩევნებზე, პროპორციულ ნაწილში გაბათილებული ბიულეტენები 0,24%-ით მეტი იყო, ხოლო მაჟორიტარულის — 0,04%-ით ნაკლები.

განცხადებაში ვკითხულობთ, რომ სულ გადაითვალეს 19 საარჩევნო უბანი, რომლეთა უმრავლესობაში შედეგები იგივე დარჩა და მხოლოდ რამდენიმე დაზუსტდა, ან შეიცვალა.

"№27 მცხეთის საოლქო საარჩევნო კომისიამ №11.27.46 საუბნო საარჩევნო კომისიის მაჟორიტარული საარჩევნო სისტემით კენჭისყრის შედეგების შემაჯამებელი ოქმი ბათილად ცნო, რაც, წინასწარი მონაცემებით, იწვევს ამ მაჟორიტარულ ოლქში მეორე ტურს", — აცხადებენ ცესკოში.

განცხადებაში საუბარი გადასატანი ყუთების შედეგებზეც.

"დათვლისა და შესაბამისი გადაწყვეტილების მიღების მიზნით 18 გადასატანი ყუთი დალუქულ მდგომარეობაში შევიდა საოლქო საარჩევნო კომისიებში. მათგან, 8 გადასატანი ყუთის მონაცემი დაემატა საარჩევნო უბნის შედეგებს (პროპორციული და მაჟორიტარული). 1 გადასატანი ყუთის მონაცემი საარჩევნო უბნის შედეგებს ნაწილობრივ (პროპორციული) დაემატა, ხოლო მაჟორიტარული წესით გაბათილდა. 9 გადასატანი ყუთი სრულად გაბათილდა", — აცხადებენ ცესკოში.