ქართული ოცნების წარმომადგენლის, გიორგი ხელაშვილის განცხადებით, მათ აქვთ ინფორმაცია, რომ რამდენიმე პოლიციელის მიმართ მიმდინარეობს შანტაჟი და გადაბირების მცდელობა და მათ თანამდებობის დატოვების სანაცვლოდ კომპენსაციასაც სთავაზობენ.

"ძალიან ხშირად, როცა რამე ინფორმაციას წინასწარ ვავრცელებთ ხოლმე, მოგვიანებით დასტურდება მოვლენებით, ვრცელდება ინფორმაცია, რომ რამდენიმე პოლიციელის მიმართ ხდება შანტაჟი, გადაბირების მცდელობა, რათა მათ განაცხადონ, რომ აპირებენ თავიანთი მოვალეობის მიტოვებას, გადადგომას, პროტესტის ნიშნად და ა.შ. წინასწარ გვინდა, გაგაფრთხილოთ, რომ ამ პოლიციელებს, თუ ასეთი ფაქტი მოხდა, ემუქრებიან კომპრომატებით, სთავაზობენ ფულს ან კომპენსაციას თანამდებობიდან წასვლის შემთხვევაში და აშანტაჟებენ პირადი, ძველი ვალდებულებებით. ამის კიდევ ერთი მაგალითი იყო გუშინდელი ცესკოს შემთხვევა, როდესაც გათავისუფლებული თანამშრომელი, რომელმაც, თითქოს პროტესტის ნიშნად დატოვა თავისი თანამდებობა, აღმოჩნდა ნაციონალურ მოძრაობასთან დაკავშირებული პირი", — განაცხადა ხელაშვილმა.

31 ოქტომბრის საპარლამენტო არჩევნების შედეგებს ოპიზიცია არ აღიარებს და ქუჩაში საპროტესტო აქციებს მართავს. პარტიებმა საკანონმდებლო ორგანოში შესვლაზე უარი უკვე თქვეს. დიდი აქციაა დაგეგმილი კვირას, 8 ნოემბერს პარლამენტის შენობასთან, რუსთაველის გამზირზე. ისინი ხელახალი არჩევნების ჩატარებას მოითხოვენ.

გუშინ თანამდებობა დატოვა ცენტრალური საარჩევნო კომისიის ერთ-ერთმა თანამშრომელმა, რის მიზეზადაც "არჩევნების გაყალბება" დაასახელა.