ქართული ოცნების ერთ-ერთი ლიდერი, მამუკა მდინარაძე ამბობს, რომ ნაციონალური მოძრაობის პოლიტსაბჭოს წევრი, დიმიტრი შაშკინი არჩევნების დღეს იარაღის "გოიმურად რეკლამირებას იკეთებდა".

პარტიის ოფისში გამართულ ბრიფინგზე მდინარაძემ განაცხადა, რომ ის დესტრუქციული ქმედებები, რაზეც არჩევნებამდე ისაუბრეს, პუნქტობრივად ასრულდა.

"ჩვენ ვლაპარაკობდით, ვინ მოუწოდებდა და ვინ იქნება დესტრუქციული, იარაღებზე, ელექტროშოკებზე და ა.შ. მერე ვნახეთ წელში იარაღგარჭობილი შაშკინი, როგორ ახდენდა, თან გოიმურად, გასაგებია, უკაცრავად ამ გამოთქმისთვის, მაგრამ ასე პროვოკაციულად ამის რეკლამირებას იკეთებდა", — განაცხადა მდინარაძემ.

არჩევნებამდე რამდენიმე დღით ადრე ქართული ოცნების აღმასრულებელმა მდივანმა, ირაკლი კობახიძემ განაცხადა, რომ ე.წ. რევოლუციური სცენარის ფარგლებში ნაციონალური მოძრაობა ამზადებდა ჯგუფს, რომელთაც გარკვეული ტიპის შეიარაღება ჰქონდათ.

არჩევნების დღეს ბოლნისში დიმიტრი შაშკინი იარაღით შენიშნეს. როგორც შაშკინმა განმარტა, მას იარაღის ტარების უფლება აქვს და საარჩევნო უბანზე იარაღით არ ყოფილა.

თავისი განცხადების შემდეგ 5 ნოემბერს ირაკლი კობახიძე სახელმწიფო უსაფრთხოების სამსახურში დაიბარეს. სუს-ის შენობიდან გამოსვლის შემდეგ, მან ჟურნალისტებთან განაცხადა, რომ გამოძიებას დაუსახელა ინფორმაციის წყარო და მიხეილ სააკაშვილის ე.წ. "რევოლუციური სცენარის" შინაარსი. კობახიძე ამბობს, რომ ლიდერების გვარებიც დაასახელა, მათ შორის დევი ჭანკოტაძე და დიმიტრი შაშკინი.