"უნდა ვიცოდეთ ვანო მერაბიშვილი ჩვენთან რჩება, თუ უგულავა-ბოკერიას ფრთას მიჰყვება" - ეს განცხადება ნაციონალური მოძრაობის წევრმა, ნიკა მელიამ გაზეთ კვირის პალიტრასთან ინტერვიუს დროს გააკეთა.

„ვანო მერაბიშვილი პოლიტპატიმარია და [ბიძინა] ივანიშვილმა ოთხ კედელში გამოკეტა, მაგრამ უამრავი გზა არსებობს იმისთვის, რომ პარტიის გენერალურმა დირექტორმა თავისი სათქმელი თქვას,“ - განუცხადა მელიამ კვირის პალიტრას.

მისი თქმით, ნაციონალური მოძრაობა არ დაშლილა და პარტიაში განახლების პროცესი იწყება. ის ინტერვიუში პარტიიდან გიგა ბოკერიასა და გიგი უგულავას გასვლის მიზეზებზეც საუბრობს.

„ბოკერია, რომელიც საკმაოდ ჭკვიანი ადამიანია, დარწმუნდა, რომ ყრილობაზე მის მიერ ინიცირებული ყველა საკითხი ჩავარდებოდა, შესაბამისად, მართვის სადავეებს მომავალი ოთხი წლის განმვლობაში დაკარგავდა. ამიტომაც შეიმუშავა გეგმა, როგორ გასულიყო პარტიიდან, თანაც ისე, რომ ნაცმოძრაობისთვის მაქსიმალური ზიანი მიეყენებინა,“ - აღნიშნა მელიამ.

ნაციონალური მოძრაობის დაშლის შესახებ განცხადება უგულავამ და პარტიის რამდენიმე წევრმა 12 იანვარს განაცხადეს.