საქართველოს პრეზიდენტის, სალომე ზურაბიშვილის განცხადებით, საოლქო საარჩევნო კომისიების შენობებთან მიმდინარე საპროტესტო აქციები, განსაკუთრებით კი აქციის მონაწილეთა აგრესიული ქმედებები საარჩევნო ადმინისტრაციის მუშაობას აფერხებს. ზურაბიშვილი ყველას სიმშვიდისა და სახელმწიფო ინსტიუტების პატივისცემისკენ მოუწოდებს.

"ასევე, მოგიწოდებთ მკაცრად დაიცვათ ყველა რეკომენდაცია, რაც ვირუსის გავრცელების პრევენციისათვის არის აუცილებელი. ეს არის ყველა პოლიტიკური პარტიის, მათი ლიდერებისა და აქციის თითოეული მონაწილის პასუხისმგებლობა", — აცხადებს სალომე ზურაბიშვილი.

თბილისსა და საქართველოს სხვადასხვა ქალაქის საოლქო საარჩევნო კომისიებთან საპროტესტო აქციები მიმდინარეობს. 31 ოქტომბრის საპარლამენტო არჩევნების შედეგებს ოპოზიცია არ აღიარებს და ქუჩაში საპროტესტო აქციებს მართავს. პარტიებმა საკანონმდებლო ორგანოში შესვლაზე უარი უკვე თქვეს.