ევროპული საქართველოს ერთ-ერთი ლიდერის, გიგა ბოკერიას თქმით, ირაკლი კობახიძის განცხადება ოპოზიციური პარტიებისთვის სახელმწიფო დაფინანსების გაუქმების შესახებ ადასტურებს, რომ ივანიშვილისა და მისი გარემოცვისთვის ფული პოლიტიკური ბრძოლის მთავარი ინსტრუმენტია.

"ამ სამარცხვინო პოლიტიკური კლოუნის განცხადება ივანიშვილის გარემოცვიდან, მიუთითებს იმაზე, თუ როგორი რთულია მათი ვითარება დღეს, როდესაც არიან ბოლომდე იზოლირებულები პოლიტიკურად თუ მორალურად მთელი საზოგადოებისაგან, მისი უდიდესი ნაწილისაგან. ეს ადასტურებს იმას, თუ როგორ უტიფრად გვეუბნება, რომ ფული, მუქარა, ან ფულის გამოყენება როგორი მთავარი ინსტრუმენტია ივანიშვილისთვის და მისი გარემოცვისთვის პოლიტიკურ ბრძოლაში", — განაცხადა ბოკერიამ.

ბოკერია ამბობს, რომ ევროპული საქართველო საკუთარ პოზიციას საპარლამენტო მანდატებზე უარის თქმასთან დაკავშირებით, არ შეიცვლის.

"ვერ ხედავენ ვითარებას, თუ გონიათ, რომ ევროპული საქართველოსთვის ეს მუქარა რამენაირად შეცვლის პოზიციას ამ პარლამენტში არ შესვლასთან დაკავშირებით", — აცხადებს ბოკერია.

ქართული ოცნების აღმასრულებელი მდივანმა, ირაკლი კობახიძემ დღეს განაცხადა, რომ ლოგიკური იქნება პარტიებმა, რომლებმაც საპარლამენტო მანდატებზე უარი თქვეს, აღარ მიიღონ სახელმწიფო დაფინანსება.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%.

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.

გაიგეთ მეტი:

ლოგიკურია, თუ პარტია უდიერად ეპყრობა ამომრჩევლის ნებას, მას უარი უნდა ეთქვას სახელმწიფო დაფინანსებაზე — კობახიძე