პარლამენტის თავმჯდომარის, არჩილ თალაკვაძის განცხადებით, საქართველოში დემოკრატიაზე თავდასხმას არ დაუშვებენ და პროტესტი ყველამ კანონით დადგენილ ფორმებში უნდა გამოხატოს. მისივე თქმით, დემოკრატიაზე თავდასხმა არის რუსეთის ინტერესებში და საზოგადოება უნდა დაფიქრდეს, რას ემსახურებია პოლიტიკური პარტიები. ასე გამოეხმაურა ის ოპოზიციის აქციებს, რომლებიც არჩევნების შედეგების გასაპროტესტებლად იმართება.

"ჩვენ არავის არ მივცემთ საშუალებას და ხელისუფლება არ დაუშვებს დემოკრატიაზე თავდასხმას. საქართველოში გადაწყვეტილებებს საზოგადოება იღებს მხოლოდ არჩევნების გზით. თუ ვინმეს აქვს პროტესტის სურვილი, თუ ვინმეს სურს, რომ თავისი მოსაზრება გამოხატოს, ამისთვის არსებობს კანონმდებლობით დადგენილი ფორმები და ამ კანონმდებლობას ვერავინ ვერ გაცდება.

ჩვენ არ დავუშვებთ, რომ საქართველოში კანონდარღვევით ვინმემ სცადოს დემოკრატიაზე თავდასხმა და ასევე გეტყვით, რომ დემოკრატიაზე თავდასხმა, არჩენვების შედეგებზე თავდასხმა ეს არის, პირველ რიგში, რუსეთის ინტერესებში", — განაცხადა მან.

თალაკვაძე და ქართული ოცნების სხვა ლიდერები ეუთო/ოდირის დამკვირვებლებს შეხვდნენ და საარჩევნო პროცესი განიხილეს. შეხვედრა საპროტესტო აქციის ფონზე წარიმართა. ოპოზიციის მხარდამჭერები და აქტივისტები აცხადებდნენ, რომ არჩევნები გაყალბებულია.

ბარიერგადალახულმა რვავე ოპოზიციურმა პარტიამ არჩევნების შედეგები ლეგიტიმურად არ აღიარა და პარლამენტის მანდატებზე უარი თქვა, მაჟორიტარმა კანდიდატებმა კი მეორე ტურში მონაწილეობა გადაიფიქრეს.