არასამთავრობო ორგანიზაცია ლგბტ საქართველოს აღმასრულებელმა დირექტორმა ლევან ბერიანიძემ On.ge-ს უთხრა, რომ დღეს დილით დაკავებული 10 ლგბტ აქტივისტი გათავისუფლებულია.

10-ვე აქტივისტის სასამართლო პროცესი გადადებულია, თუმცა თარიღები ჯერ არ არის ცნობილი.

დღეს, 17 მაისს, გამთენიისას, თბილისში 10 ლგბტ აქტივისტი იმ დროს დააკავეს, როცა ისინი მართლმადიდებელი ეკლესიის საპატრიარქოს ღობეზე წარწერის გაკეთებას ცდილობდნენ "სიყვარული თანასწორია".

ჰომოფობიასა და ტრანსფობიასთან ბრძოლის საერთაშორისო დღეს ლგბტ აქტივისტების დაკავება ლევან ბერიანიძემ უსამართლობად შეაფასა, ის მიიჩნევს, რომ სახელმწიფო არათანაბრად ეპყრობა აქტივისტებსა და ლგბტ პირებზე მოძალადეებს:

"ჩვენი აქტივისტების დაკავება, რომლებიც კედლებზე წერდნენ "სიყვარული თანასწორია" და მსგავს ფრაზებს, არის შემაშფოთებელი, რადგან ეს ხდება იმ კონტექსტში, როცა სახელმწიფო უსუსურია გამოიძიოს სიძულვილით მოტივირებული დანაშაულები. სახელმწიფო არ სჯის იმ ადამიანებს რომლებსაც დანაშაული მიუძღვით ლგბტ ადამიანების მიმართ და შემდეგ გვეუბნება, რომ სწორედ ასე, ლგბტ აქტივისტების ამგვარი ქმედების დასჯით უზრუნველყოფს კანონის უზენაესობას.

სახელმწიფომ კვლავ ვერ მისცა გარანტია ლგბტ აქტივისტებს რომ ისინი შეძლებდნენ უსაფრთხოდ შეკრებას და სახელმწიფომ ვერ დაიცვა მათი გამოხატვის თავისუფლება, ასევე არ დაუტოვა გამოხატვის საშუალება იმის გარდა, რომ აქტივისტებს ჩაეტარებინათ პარტიზანული აქტივობები".

შეგახსენებთ, რომ დღეს ლგბტ თემმა ჰომოფობიასთან ბრძოლის დღე ვერ აღნიშნა, როგორც თქვეს, სახელმწიფომ მათი უსაფრთხოების ზომების დაცვა ვერ უზრუნველყო.