ერთიანი ნაციონალური მოძრაობის ერთ-ერთ ლიდერს, ნიკა მელიასა და ძალა ერთობაშიას საარჩევნო ბლოკის წევრ, გუბაზ სანიკიძეს შორის სიტყვიერი დაპირისპირება მოხდა. ისინი ერთმანეთს მთავარი არხის ეთერში მას შემდეგ დაუპირისპირდნენ, რაც გუბაზ სანიკიძემ განაცხადა, რომ ბიძინა ივანიშვილს მხოლოდ მიხეილ სააკაშვილის ეშინია. აღნიშნულზე მელიამ განაცხადა, რომ ეს განცხადება ოპოზიციური ერთობისთვის დამაზიანებელი იყო.

გუბაზ სანიკიძის თქმით, შვიდი შტაბის ქონას ერთი დიდი შტაბის ქონა ჯობდა და "ოპოზიციამ არჩევნები ორიანზე ჩაატარა".

"რვა წელია ვეჯაჯგურებით ბიძინას, ვერაფერი ვერ ვუქენით. ხალხო, უნამუსოს ნამუსზე ნუ ელაპარაკებით. მე მიმაჩნია, რომ არც ერთი ჩვენთაგანის არ ეშინია ბიძინას, სამჯერ მეტი რომ დავჯდეთ, არ ეშინია, ჩემი ჩათვლით, მას დედამიწაზე ეშინია ერთადერთი კაცის დედამიწაზე, ეს არის მიხეილ სააკაშვილი", — თქვა სანიკიძემ.

აღნიშნულ გამონათქვამებზე მელიამ განაცხადა, რომ ოპოზიციის ერთობაში ხინჯის შეტანა არასწორი იყო.

"შენ, გუბაზ სანიკიძე კი არა, ანზორ მელიაც რომ იყოს, ვისაც შემოაქვს ხინჯი ოპოზიციურ პარტიებს შორის, არის მიუღებელი ჩემთვის. [...] რა გინდა, მოგზავნილი ხომ არ ხარ, ვის უნახიხარ ბრძოლის ველზე?", — უთხრა მელიამ სანიკიძეს.

"ხან ბიძინას აქებ, ხან მიშას აქებ, ხვალ პეტრეს შეაქებ, ზეგ პავლეს, მიშაზე მეტი მიშისტი ხარ და ჩვენ ვართ ახლა ამ ქვეყნის მტრები?", — უთხრა მელიამ სანიკიძეს.

სანიკიძის თქმით, "სუყველა მიხეილ სააკაშვილით არიან დაკომპლექსებული". მან ნიკა მელიას განუცხადა, რომ ის არჩევნების დღეს საარჩევნო შტაბიდან არ გასულა.