ია ანთაძე საზოგადოებრივი მაუწყებლის ახალარჩეული გენერალური დირექტორის, ვასილ მაღლაფერიძის მრჩეველი ხდება. ამის შესახებ ინფორმაციას დირექტორიც და მისი მრჩეველიც ადასტურებენ.

ანთაძე მაღლაფერიძეს რჩევებს საზოგადოებრივ-პოლიტიკური გადაცემებისა და საზოგადოებასთან ურთიერთობის კუთხით მისცემს.

„ბევრი წლის განმავლობაში ჩემი დიდი ნატვრა იყო, რომ მემუშავა ამ ტელევიზიაში ჩემი ცოდნა და გამოიცდება, რაც მაქვს ამ ტელევიზიის რესურსისთვის შემეერთებინა. ახლა ძალიან დიდი გამოწვევები აქვს საზოგადოებრივ მაუწყებელს, ჩემთვის დიდი პატივია მონაწილეობა მივიღო ამბიციურ გეგმაში - საზოგადოებრივი მაუწყებელი გახდეს ქართული მედიის ფლაგმანი ორგანიზაცია,“ - აღნიშნავს ანთაძე, რომელიც დასძენს, რომ მას „ძველი მენეჯმენტის“ დროს შემოთავაზება ჰქონდა ახალი გადაცემის დაწყების შესახებ.

როგორც არხის დირექტორი ამბობს, მრჩევლად ანთაძე პროფესიონალიზმითა და მისდამი ნდობის გამო შეარჩია. ის არ ამხელს, კიდევ გეგმავს თუ არა მრჩევლების დანიშვნას და რა ცვლილებების განხორციელებს.

ია ანთაძე და ვასილ მაღლაფერიძე ადრეც თანამშრომლობდნენ. მაშინ, როცა მაღლაფერიძე GDS-ზე გადაცემა 2030-ის პროდიუსერი იყო, ანთაძის ორგანიზაცია - სამოქალაქო განვითარების ინსტიტუტი - არხზე გადაცემას ამზადებდა.

მაღლაფერიძე საზოგადოებრივი მაუწყებლის დირექტორი 1 კვირის წინ გახდა. მისი CV-ის მიხედვით, ბოლო დროს საქართველოს ყოფილი პრემიერ-მინისტრის ბიძინა ივანიშვილი ოჯახის კუთვნილ ტელეკომპანია GDS-ში გადაცემა 2030-ის გენერალურ პროდიუსერად მუშაობდა. მისი მედიაში მუშაობა ტელეკომპანია GDS-ით არ შემოიფარგლება. სხვადასხვა დროს იყო TV9-ის, რომელიც ასევე ბიძინა ივანიშვილის ოჯახს ეკუთვნის, დირექტორის მოადგილე, ჟურნალ კალმასობას მთავარი რედაქტორი, გაზეთ კავკასიონის დამფუძნებელი, რედაქტორი და მთავარი კონსულტანტი. გარდა ამისა, 2 მოწვევის პარლამენტის წევრი, ნაციონალური მოძრაობის ხელისუფლებაში ყოფნის დროს გუბერნატორი და სახალხო დამცველის აპარატის ინფორმაციისა და პოლიტიკის დეპარტამენტის უფროსი.