ქართული ოცნების ერთ-ერთი ლიდერი მამუკა მდინარაძე ეგზიტპოლების შედეგებს ეხმიანება:

"ეს იყო, უკაცრავად, არ მჩვევია ხოლმე მაინცდამაინც ასეთი გადახვევები, მაგრამ ნაცების უკანასკნელი გაფართხალება. იმიტომ, რომ ისინი 8 წელი ელოდებოდნენ რევანშს და მართლა მჯერა, რომ დარწმუნებულები იყვნენ, რომ 8 წლის შემდეგ ისინი ამ რევანშს მოახერხებდნენ. ახლა აქვთ სრული აგონია. ყველაფერს რომ თავი დავანებოთ, მათ სახეებსა და რეაქციას შეგიძლიათ შეხედოთ. მათი ბელადის, მათი ლიდერის რეაქციას შეგიძლიათ შეხედოთ რას ლაპარაკობს უბრალოდ იმ რეალური მონაცემების ფონზე", — აცხადებს მდინარაძე.

მამუკა მდინარაძე ასევე ამბობს, რომ ტელეარხების მიერ გამოქვეყნებული ეგზიტპოლების განსხვავებული მონაცემების მიუხედავად, ქართულ ოცნება ოლქების უმეტესობაში პირველივე ტურში გამარჯვებას ელოდება.

ეგზიტპოლების შესახებ

არჩევნების დღეს ეგზიტპოლები დამოუკიდებელმა ორგანიზაციებმა, მედიებმა და ISFED-მა ჩაატარეს. მათი შედეგები 8 საათზე გავრცელდა.

  • წელს არჩევნებზე ეგზიტპოლს ამერიკულ კომპანია Edison Research ტელეკომპანია ფორმულას დაკვეთით ატარებს.
  • მთავარი არხისთვის ეგზიტპოლებს ატარებს ფრანგული კომპანია IPSOS.
  • რუსთავი 2-სთვის ეგზიტპოლებს ბრიტანული კვლევითი კომპანია Survation ატარებს.
  • ტელეკომპანია იმედის დაკვეთით კი ეგზიტპოლებს ამერიკული კომპანია Public Opinion Strategies ატარებს.

არჩევნების დღეს ხმებს პარალელურად ითვლის არასამთავრობო ორგანიზაცია სამართლიანი არჩევნებისა და დემოკრატიის საერთაშორისო საზოგადოებაც (ISFED).

ედისონს საქართველოში სხვადასხვა დროს აქვს ეგზიტპოლი ჩატარებული. იუსტიციის სამინისტროს მიერ გამოქვეყნებული ინფორმაციით, IPSOS 2019 წელს ატარებდა კვლევას საქართველოში სასამართლო რეფორმების შესაფასებლად. Survation და Public Opinion Strategies კი საქართველოში ეგზიტპოლებს პირველად ატარებენ.