საერთაშორისო გამჭვირვალობა საქართველოს თავმჯდომარე, ეკა გიგაური მარნეულის სოფელ აზიზქენდში On.ge-ს ჟურნალისტისთვის მუშაობაში ხელის შეშლას და იარაღის ჩვენებას ეხმაურება. მისი თქმით, ზეწოლის ფაქტებზე უნდა დადგეს სისხლისსამართლებრივი პასუხისმგებლობა.

"ნებისმიერი ზეწოლა, რომელიც მომდინარეობს პირისგან და განსაკუთრებით თუ ეს ზეწოლა არის ჟურნალისტზე, არის სისხლის სამართლის დანაშაული, ამიტომ რა თქმა უნდა, ამაზე უნდა დაიწყოს გამოძიება და კონკრეტული პირის პასუხისმგებლობა დადგეს", — განაცხადა ეკა გიგაურმა.

მარნეულში, სოფელ აზიზქენდში, #14 უბანზე მყოფ On.ge-ს ჟურნალისტს ევროპული საქართველოს წარმომადგენელმა მუშაობაში ხელი შეუშალა. დარინა ქამადაძის თქმით, უბანზე ფოტოების გადასაღებად შევიდა, რეგისტრაციის დროს კი შენიშნა ადამიანი, რომელიც საეჭვოდ მოეჩვენა და ჰკითხა, რომელ ორგანიზაციას წარმოადგენდა. ჟურნალისტი აღნიშნავს, რომ ამ პირმა ჯერ ცესკოს მიერ გაცემულ დამკვირვებლის მოწმობაზე მიუთითა, რომელიც ქურთუკის ქვეშ ჰქონდა, შემდეგ კი აჩვენა, რომ შეიარაღებულია. დარინა ქამადაძის თქმით, კითხვაზე, რატომ გადაადგილდება უბანზე იარაღით, კაცმა უპასუხა, რომ ეს მისი იარაღია.

მას შემდეგ, რაც On.ge-ს წარმომადგენელმა კამერა ჩართო, კაცმა იარაღი დამალა და ჟურნალისტს კამერაზე ხელი დაარტყა. მოგვიანებით, ის სხვა ქურთუკით გამოჩნდა და თქვა, რომ იარაღი კიარა, ტელეფონი ჰქონდა.