ონლაინგამოცემა OC Media-ზე კიბერთავდასხმა განხორციელდა. მედიის მიერ გავრცელებულ განცხადებაში ვკითხულობთ, რომ საიტი რამდენიმე საათის განმავლობაში გათიშული იყო. მათი განმარტებით, ჰაკერები საიტზე წვდომის მოსაპოვებლად უამრავი ანგარიშიდან შესვლას ცდილობდნენ.

მედიის ინფორმაციით, ხუთშაბათს შუადღეზე, OC Media-ს ტექნიკურმა ჯგუფმა პრობლემის აღმოფხვრა და შეტევის ბლოკირება შეძლო, თუმცა თავდამსხმელის იდენტიფიცირება — ვერა. მათივე ცნობით, საიტზე გარკვეული ხარვეზი 5 ოქტომბერსაც დაფიქსირდა.

განცხადებაში აღნიშნულია ისიც, რომ მთიან ყარაბაღში კონფლიქტის დაწყების შემდეგ მსგავსი შეტევები ახალი ამბების საიტებსა თუ სამთავრობო სააგენტოებზე აზერბაიჯანსა და სომხეთშიც განხორციელდა. გამოცემის ინგლისურენოვანი სერვისის რედაქტორი, რობინ ფაბრო, მიანიშნებს, რომ თავდასხმის დრო შესაძლებელია, დაკავშირებული იყოს მიმდინარე ომთან.