სტრატეგია აღმაშენებელში აცხადებენ, რომ 27 საათიანი უწყვეტი ტურნეს ფარგლებში, რომელიც ბათუმიდან დაიწყო 17-ზე მეტი ლოკაცია მოიარა, ასობით მხარდამჭერს შეხვდა და საქართველოს აღმშენებლობის გეგმა გააცნო.

"ჩვენ გუშინ, დილით 09:00 საათზე ბათუმიდან 27 საათიანი უწყვეტი ტურნე დავიწყეთ. მოვიარეთ 17-ზე მეტი ლოკაცია და ასობით ადამიანს შევხვდით მთელი საქართველოს მასშტაბით. სამწუხაროდ, ქვეყნის ყველა რეგიონში უკიდურესი გაჭირვებაა. პენსიონრები, რომლებიც უსამართლოდ მაღალი სესხის პროცენტის გადახდას ვეღარ აუდიან; სოციალურად დაუცველები, რომლებიც ვეღარანაირ საკვებს ვეღარ ყიდულობენ იმისთვის, რომ ელემენტარულად გამოკვებონ საკუთარი ოჯახი; სოფლად თუ ქალაქად, ადამიანების ცხოვრების პირობები ნამდვილად არ შეესაბამება იმ რეალობას რასაც ქართული ოცნება გვიხატავს. არის უმძიმესი მდგომარეობა, სადამდეც დამსხვრეული ოცნებების პარტიამ მიგვიყვანა, მაგრამ ამასთან ერთად, ჩვენ ამ ადამიანებში ვნახეთ ის რწმენა, რომ საქართველოს მომავალი გააჩნია", — აცხადებს ვაშაძე.

სტრატეგია აღმაშენებლის ლიდერი, ამომრჩევლს მოუწოდებს არჩევნებში მონაწილეობისკენ და იმ რეფორმებს ჩამოთვლის, რის შესრულებასაც გამარჯვების შემთხვევაში აპირებს.

"მე მინდა საქართველოს თითოეულ მოქალაქეს კიდევ ერთხელ მოვუწოდო, რომ ეს სიღარიბე, ეს გაჭირვება, ეს უმძიმესი ვითარება დავამარცხოთ ქვეყანაში, რისთვისაც აუცილებელია 31 ოქტომბერს ყველანი მივიდეთ არჩევნებზე, მივიდეთ და ხმა მივცეთ ცვლილებებს, სიახლეს და უარი ვუთხრათ მათ, ვინც ამდენი წლის განმავლობაში გატყუებდათ, ვინც დამნაშავეა თქვენს მძიმე სოციალური პირობების შექმნაში.

მთავარი საკითხი, რაზეც ხალხი საუბრობს, ეს სიღარიბე, შიმშილი და გაჭირვებაა. მათ ფული არ აქვთ საკვების შესაძენად, შრომისუნარიან ადამიანებს სამუშაო ადგილი არ აქვთ, პენსიონრებს არჩევანის გაკეთება უწევთ წამალსა და საკვებს შორის, უსამართლოდ მაღალია წამლების ფასი. სწორედ ამიტომ, თითოეულ ადმიანს ვპირდებით, გამარჯვების პირველ 30 დღეში პენსიონრებს სესხის უსამართლოდ მაღალ 36-40%-ს ჩამოვაწერთ, 30%-ით გავაიაფებთ წამლებს, ყველას ვინც სამუშაო ადგილი დაკარგა, მცირე და საშუალო ბიზნესის წარმომადგენლებს, ვისაც შეუმცირდათ ბიზნესი 6 თვის მანძილზე სესხის პროცენტს დავუსუბსიდირებთ და რაც მთავარია გავასამმაგებთ კორონა ვირუსის ტესტების რაოდენობას, რომ რაც შეიძლება სწრაფად მოვახდინოთ ლოკალიზება. დავიწყებთ აღმშენებლობას თქვენთან ერთად და აუცილებლად დავამარცხებთ სიღარიბეს", — განაცხადა გიორგი ვაშაძემ.

პარტიის ლიდერის, გიორგი ვაშაძის განცხადებით, ყველა ქალაქს განვითარების თანაბარი შესაძლებლობა ექნება, ქუთაისი კი, სადაც შემაჯამებელი შეხვედრა გაიმართა, საპარლამენტო დედაქალაქის სტატუსს დაიბრუნებს.

"დიდი მადლობა ჩვენს თანაგუნდელებს, ვინც მთელი 27 საათის მანძილზე დაუზარელად, აქტიურად, ენერგიულად დადიოდა რეგიონებში. მადლობა ჩვენს წარმომადგენლებს რეგიონებში და მათ მინდა ვუთხრა, რომ სწორედ სტრატეგია აღმაშენებლის ენერგია არის ის ენერგეტიკა, რომელიც ახლა სჭირდება საქართველოს. ჩვენი უშრეტი და დაუღალავი ენერგია, 24/7 შრომა საჭიროა იმისათვის, რომ თითოეულ ქართულ ოჯახში მოვიტანოთ სიკეთე და კონკრეტული შედეგი.

ჩვენი მიზანია საქართველოს თითოეული მოქალაქე საკუთარ თავზე გრძნობდეს ქვეყნის განვითარებასა და წინსვლას. ყველა იმ ადამიანს, რომელსაც ხელი ჩამოგართვით და დაგპირდით, რომ უსამართლობას შევცვლით, აუცილებლად გავაკეთებთ. პოლიტიკოსების მიმართ ნდობას დავაბრუნებთ ქვეყანაში", — განაცხადა გიორგი ვაშაძემ.