თბილისის ვიცე-მერმა, ირაკლი ხმალაძემ, განაცხადა, რომ მიკროავტობუსების მძღოლების ანაზღაურება ფიქსირებული იქნება, რითიც მარშუტზე მოძრაობის გრაფიკიდან გადაცდომისა და მგზავრის ფეხზე დგომის პრევენცია მოხდება.

"ყველამ კარგად ვიცით, რომ დღეს მოქმედებს მიკროავტობუსების ბაზარზე სისტემა, სადაც მძღოლის შემოსავალი დამოკიდებულია იმაზე, თუ რა რაოდენობის მგზავრობას განახორციელებს. შესაბამისად, ხდება გრაფიკიდან გადაცდომა. ყველას გვისარგებლია მიკროავტობუსით და თავიდან ნელა ატარებენ, რომ, რაც შეიძლება მეტი მგზავრი ჩასვან ამ მიკროავტობუსში და მგზავრების რაოდენობა ყოველთვის არის გადაჭარბებული", — განაცხადა ხმალაძემ.

მისივე თქმით, მიკროავტობუსების ხაზების მონიტორინგი თანამედროვე GPS და მგზავრთა მთვლელის სისტემის გამოყენებით განხორციელდება.

თბილისის მერიის ინფორმაციით, თბილისის სატრანსპორტო კომპანიამ, მუნიციპალური ავტოპარკის განახლების პროექტის ფარგლებში, 143 ერთეული MAN-ის მარკის 12-მეტრიანი ავტობუსი, 90 ერთეული MAN-ის მარკის 10-მეტრიანი ავტობუსი, 220 ერთეული ISUZU-ს მარკის 8-მეტრიანი ავტობუსები ექსპლუატაციაში გაუშვა. მათივე თქმით, 2021 წელს, 180 ერთეული 18-მეტრიანი ავტობუსების შეძენაა დაგეგმილი.