რუსეთის საგარეო დაზვერვის სამსახურის ხელმძღვანელ სერგეი ნარიშკინთან შეხვედრაზე ბელარუსის პრეზიდენტმა, ალექსანდრე ლუკაშენკომ განაცხადა, რომ სამოკაშირეო სახელმწიფოების გარშემო მარტივი ვითარებაა არაა შექმნილი და მოკავშირეებმა გამოწვევებს ერთად უნდა უპასუხონ.

"ამ შეშლილ, განსაკუთრებით, პანდემიისგან გაგიჟებულ სამყაროში, ბევრი მეგობარი არ გვყავს. მაგრამ ყველას ინტერესი ჩვენზე — ბელარუსსა და რუსეთზეა მიმართული. ჩვენ რეაგირება უნდა გვქონდეს. ვფიქრობ, ბევრ რამეზე მოვრიგდებით: ერთობლივ მუშაობასა და ჩვენი ხალხის საკეთილდღეოდ მოქმედებაზე, რა თქმა უნდა", — განაცხადა ლუკაშენკომ.

რუსეთის სახელისუფლებო მედია ტასის ცნობით, ნარიშკინისა და ლუკაშენკოს შეხვედრა დღეს, 22 ოქტომბერს გაიმართა. შეხვედრაზე ლუკაშენკომ ნარიშკინს ბელარუსის სპეცსამსახურებისა და უშუალოდ მისთვის შესაბამისი ინფორმაციის მიწოდებისთვის მადლობა გადაუხადა.

საპროტესტო აქციების პარალელურად ალექსანდრე ლუკაშენკოს ხელისუფლების მხრიდან რეპრესიები კვლავ გრძელდება. აქციებზე აკავებენ ათეულობით ადამიანს, ოპოზიციის წევრებს კი დაკითხვებზე იბარებენ.

9 აგვისტოს ჩატარებულ საპრეზიდენტო არჩევნების შედეგებს მოსახლეობა არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.