პირბადის გარეშე მიკროავტობუსების მართვის გამო 24 მძღოლს მუშაობის უფლება 2 დღით ჩამოერთვათ. ამის შესახებ დედაქალაქის მერმა, კახა კალაძემ ისაუბრა.

"მუშაობის უფლება ჩამოერთვათ იმიტომ, რომ ადამიანებმა იცოდნენ, რამხელა პასუხისმგებლობა აქვთ. ყოველდღიურად გადაგყავს უამრავი ადამიანი და ხარ წარმოდგენილი პირბადის გარეშე, რომელიც არის ყველაზე მთავარი დამცავი შესაძლებლობა", — განაცხადა კახა კალაძემ.

მერმა ისაუბრა მიკროავტობუსებსა და ავტობუსებში მომხადრი დარღვევების სხვა შემთხვევებზეც. მისი განცხადებით, მიკროავტობუსში გამოავლინეს 224 მოქალაქე, რომელსაც პირბადის გარეშე მგზავრობის მცდელობა ჰქონდა, ავტობუსში კი — 2088 მგზავრს, რასაც შესაბამისი რეაგირება მოჰყვა.

ასევე, კალაძემ განაცხადა, რომ 1 500-მა მგზავრმა პირბადეზე გაფრთხილება მიიღო, ხოლო 116-ჯერ ავტობუსი არ დაიძრა იმის გამო, რომ მოქალაქეები პირბადეს არ იკეთებდნენ. კალაძის მოსაზრებით, შესაძლოა, ზოგიერთი მიზანმიმართულად არ იცავდეს წესებს.

კალაძემ აღნიშნა, რომ მნიშვნელოვანია, გავითვალისწინოთ ეპიდემიოლოგების რჩევები და პირბადე სწორად გავიკეთოთ, ანუ დაფარული გვქონდეს პირიც და ცხვირიც.