ოზურგეთის მუნიციპალიტეტის 11 საბავშვო ბაღში 70 ბავშვი მოიწამლა. მუნიციპალიტეტის ბაღებში სწავლის პროცესი შეჩერებულია.

როგორც On.ge-ს მუნიციპალიტეტის გამგეობაში განუცხადეს, ბავშვებს მოწამვლის სიმპტომები პარასკევ საღამოს ერთ-ერთ ბაღში გამოუვლინდათ, მოგვიანებით კი გაირკვა, რომ ამავე სიმპტომებით მოწამლული ბავშვები კიდევ 10 ბაღში იყვნენ.

"ბაღის მენეჯერმა ბაღების გაერთიანებას აცნობა. მათ მიიღეს გადაწყვეტილება, რომ სასწრაფოდ შეეწყვიტა სასწავლო პროცესი ყველა ბაღში. ასევე, დაუკავშირდნენ სურსათის უვნებლობის სამსახურს, რომ საკვებზე ანალიზი ჩაეტარებინათ, საკვებით ინფიცირება ხომ არ იყო მიზეზი. თავად მშობლებს არ მოუმართავთ, ბაღების გაერთიანებამ დაიწყო გადამოწმება, რამდენი ბავშვი იყო მოწამლული", — განაცხადეს მუნიციპალიტეტის გამგეობაში.

მუნიციპალიტეტის ინფორმაციით, ამ ეტაპზე მხოლოდ ერთი ბავშვია ბათუმის კლინიკაში მოთავსებული, დანარჩენი ყველა სახლშია და ზოგი თავს უკვე კარგად გრძნობს.

On.ge დაუკავშირდა სურსათის ეროვნულ სააგენტოს, სადაც გვითხრეს, რომ სურსათის ნიმუშები უკვე აღებულია და ამ დროისთვის ლაბორატორიული კვლევა მიმდინარეობს.

როგორც On.ge-ს დაავადებათა კონტროლისა და საზოგადოებრივი ჯანმრთელობის გურიის ცენტრში განუცხადეს, სასმელი წყლით მოწმავლის ვერსიას გამორიცხავენ, რადგან სხვადასხვა ბაღებს ერთი და იგივე წყალი არ მიეწოდებათ.

გარდა ამისა, რომ NCDC-ში ამბობენ, რომ არსებული მდგომარეობის შესახებ ინფორმაცია წუხელ მიიღეს, ამ ეტაპზე კვლევა მიმდინარეობს და კვლევის შედეგები საღამოს გახდება ცნობილი.