17 ოქტომბრის ღამით, რუსთავში ლელოს მაჟორიტარობის კანდიდატმა, გრიგოლ გეგელიამ Facebook-ზე დაწერა, რომ იაღლუჯის მთიდან გადმოხტომას აპირებდა. ამავე პოსტით, დაინტერესებულ პირებს მთაზეც ეპატიჟებოდნენ.

მოქალაქეების ნაწილში გაჩნდა ეჭვი, რომ გეგელიას ფეისბუქი გაუტეხეს. სწორედ ამის გადასამოწმებლად On.ge თავად კანდიდატს დაუკავშირდა. როგორც აღმოჩნდა, მართალია, მას პოსტში არ დაუკონკრეტებია, თუმცა პარაპლანით გადმოხტომას გულისხმობდა. მეტიც, როგორც გაირკვა, ის არ არის რუსთავის მაჟორიტარობის ერთადერთი კანდიდატი, ვინც ეს გააკეთა.

On.ge დაინტერესდა, ხომ არ არის ეს რამე პოლიტიკური გზავნილი და ესაუბრა იმ ადამიანებს, რომლებმაც წინასაარჩევნოდ მთიდან გადმოხტომა გადაწყვიტეს.

გრიგოლ გეგელიას თქმით, ფრენის შეთავაზება პარაპლანის საინიციატივო ჯგუფისგან მიიღო. მისი აზრით, ამ გადმოხტომით ახალგაზრდული ინიციატივებს მხარდაჭერასა და ჯანსაღი ცხოვრების წესს უწევს პოპულარიზაციას.

"ამით პოპულარიზაციას ვუწევ სწორი ახალგაზრდული პოლიტიკის არსებობას, რომელსაც ყველა პოლიტიკოსის მხრიდან უნდა შეეწყოს ხელი, განსაკუთრებით საქართველოს პარლამენტში", — განაცხადა გრიგოლ გეგელიამ.

როგორც აღმოჩნდა, გეგელიამდე იაღლუჯის მთიდან ევროპული საქართველოს მაჟორიტარობის კანდიდატს, ირმა ნადირაშვილს უფრენია. ამ შემთხვევაშიც, შეთავაზება კონკრეტული ჯგუფისგან იყო.

"მომწერეს, როგორც მაჟორიტარობის კანდიდატს, თუ დავინტერესდებოდი, რომ მივსულიყავი და ამ ჯგუფის საქმიანობის შესახებ გამეგო. ჯერ ოფისში გვქონდა შეხვედრა, მერე მივედი იაღლუჯზე მათთან ერთად. ერთი კვირის წინ ვიფრინე. მითხრეს და წავედი, რადგან ბავშვობიდან ძალიან მინდოდა ფრენა", — განაცხადა ირმა ნადირაშვილმა.

მან აღნიშნა, რომ მფრინავებს ლიცენზია და შესაბამისი გამოცდილება აქვთ, ამიტომ ფრენა უსაფრთხო იყო.

გირჩის ერთ-ერთი ლიდერი და ასევე რუსთავის მაჟორიტარობის კანდიდატი, ვახტანგ მეგრელიშვილი კი ამბობს, რომ პარაპლანით ფრენაში არანაირი პოლიტიკური მესიჯი არ იყო და მხოლოდ საკუთარი სიამოვნებისთვის გააკეთა.

"ჩვენი მეგობრები არიან ეს ბიჭები. ჩვენს ლექციებზე იყვნენ და იქ შემოგვთავაზეს. ამ ბიჭებს სჭირდებათ პოპულარიზაცია იმის, რასაც აკეთებენ. ეს იყო ახალი ემოცია. მივიღე შემოთავაზება და სიამოვნებაც განვიცადე", — განაცხადა ვახტანგ მეგრელიშვილმა.

იფრინეს თუ არა პარაპლანით რუსთავის მაჟორიტარობის კანდიდატებმა სხვა პარტიებიდან, On.ge-სთვის ამ ეტაპზე უცნობია. დამატებითი ინფორმაციის შემთხვევაში, მასალა განახლდება.