დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, 135 000-ის გარდა, სახელმწიფო დამატებით გრიპის ვაქცინის 100 000 დოზას ყიდულობს. გამყრელიძის თქმით, დამატებითი დოზა ქვეყანაში, სავარაუდოდ, ოქტომბრის ბოლოდან უნდა შემოვიდეს.

"გარდა ამისა, ვმუშაობთ, რომ ნოემბრის მეორე ნახევარში სახელმწიფოს მიერ კიდევ დამატებით იყოს მობილიზებული გრიპის დოზები", — განაცხადა NCDC-ის ხელმძღვანელმა.

გამყრელიძემ, ასევე, აღნიშნა, რომ 135 000 დოზიდან 25 000 ქვეყანაში უკვე შემოვიდა და რისკჯგუფებში შემავალი ადამიანების აცრა მიმდინარეობს. 23 ოქტომბრის კვირაში კი დარჩენილი 110 000 დოზა უნდა შემოვიდეს, რომელიც სხვა რისკჯგუფებზე განაწილდება.

არარისკჯუფში შემავალ ადამიანებზე საუბრისას, გამყრელიძემ განაცხადა, რომ კერძო სექტორის მიერ შემოტანილი 20 000 დოზა უკვე გაიხარჯა. მისი ინფორმაციით, კერძო კლინიკებს გრიპის 40 000 ვაქცინა ოქტომბრის ბოლოში ან ნოემბრის დასაწყისში ექნებათ.

15 ოქტომბერს საქართველოში კორონავირუსის 919 ახალი შემთხვევა დაფიქსირდა, გამოჯანმრთელდა — 208, გარდაიცვალა — 4.

ქვეყანაში სულ 14 440 დადასტურებული შემთხვევაა, მათგან 7 367 უკვე გამოჯანმრთელდა, გარდაიცვალა — 113.

ამ დროისთვის კარანტინის რეჟიმში 5 792 ადამიანი იმყოფება, სტაციონარში მეთვალყურეობის ქვეშ — 836, კოვიდ სასტუმროში 1 042 პირი მკურნალობს.