კარტოგრაფების საქმის ერთ-ერთი ფიგურანტის, დავით ხიდაშელის თქმით, რუკების მოძიება მას ქართული ოცნების თავმჯდომარემ, ბიძინა ივანიშვილმა სთხოვა. ამავე დროს, დაკავებული ივერი მელაშვილის ადვოკატები აცხადებენ, რომ ხიდაშელის ჩვენებასა და საჯარო განცხადებას შორის აცდენაა.

კერძოდ, ჩვენებაში, რომელიც On.ge-მ მოიპოვა, ხიდაშელი აღნიშნავს, რომ დახმარებისთვის მისი მეგობარი, ბეჟან მაისურაძე დაუკავშირდა.

საგამოძიებო ორგანოებს ხიდაშელი 2020 წლის 25 აგვისტოს ესაუბრა. ჩვენებაში წერია:

დავით ხიდაშელი ბეჟან მაისურაძეს ჩვენების სხვა მონაკვეთშიც ახსენებს. მისი თქმით, მაისურაძესთან ერთად ის 2020 პირველ აგვისტოს დაესწრო შეხვედრას, რომელიც საზღვრის დაცვის დეპარტამენტში გაიმართა და იქ რუკების საკითხი განიხილეს. ამასთან, ჩვენებაში მას საერთოდ არ უხსენებია ბიძინა ივანიშვილი და მისი ზარი.

უკვე გუშინ, 13 ოქტომბერს, დავით ხიდაშელმა ღამის კურიერთან ინტერვიუში თქვა, რომ 2019 წელს რუკების საკითხზე მას ბიძინა ივანიშვილმა დაურეკა. როგორც თვითონ ამბობს, ივანიშვილი 2017 წელს გაიცნო და მას შემდეგ არ უნახავს.

"2019 წლის სექტემბერში დამირეკა, ჩემთვის შოკისმომგვრელი ინფორმაცია მომაწოდა. მაშინ მომიყვა, რომ პრობლემები შეიქმნა დავით გარეჯის მონასტერთან და საქართველო-აზერბაიჯანის საზღვართან დაკავშირებით, მან მთხოვა დახმარება, რომ მომეძია რაღაც რუკა და რომ ჩავეძიე, რა გინდათ და რაში სჭირდება ჩემი დახმარება-მეთქი, მითხრა, დაურეკე ირაკლი ღარიბაშვილს და თავდაცვის სამინისტრომ იცის ეს დეტალებიო", — თქვა ბიზნესმენმა.

ხიდაშელი იხსენებს, რომ ირაკლი ღარიბაშვილთან სატელეფონო საუბრის შემდეგ ის თავდაცვის სამინისტროს კარტოგრაფიული სამსახურს დააკავშირეს. მისივე თქმით, იმის გამო, რომ ის ამ დროს ქვეყანაში არ იმყოფებოდა დახმარება თავის მეგობარს, ბეჟან მაისურაძეს სთხოვა.

"ვთხოვე ჩემს მეგობარ ბეჟან მაისურაძეს, რომ ღარიბაშვილი თუ გახსოვს, ჩვენი სოფლის გვერდზე ცხოვრობდა ისიც, თავდაცვის სამინისტროში რომ მიხვიდე და გაიგო, ზუსტად რა უნდათ, ვინაიდან ტელეფონში არ მეუბნებიან, ძალიან დიდი თემაა, მიდი და ითამაშე იგივე კურიერის როლი", — თქვა ხიდაშელმა.

ხიდაშელისა და ივანიშვილის კავშირზე ისაუბრა დეკანოზმა, საბა ჭიკაიძემაც. მისი თქმით, რუკის მოძიებისთვის დავით გარეჯის აქრიმანდრიტმა, კირიონმა ირაკლი ღარიბაშვილს მიმართა, რომელიც შემდეგ ბიძინა ივანიშვილს დაუკავშირდა. მისი განმარტებით, ივანიშვილი ამ თემით დაინტერესდა და დავით ხიდაშელს აცნობა.

ივერი მელაშვილის ადვოკატი, ედუარდ მარიკაშვილი აღნიშნავს, რომ ხიდაშელის ჩვენებასა და ინტერვიუს შორის მნიშვნელოვანი აცდენაა. მისივე თქმით, თვითონ ბეჟან მაისურაძე გამოკითხული არ არის და მისი პიროვნების შესახებ არაფერი იციან. აღსანიშნავია, რომ მაისურაძე ჩვენებაში ნოდარ ხორბალაძეს, კარტოგრაფია-გეოდეზიის დეპარტამენტის ხელმძღვანელსაც ჰყავს ნახსენები.

"ეს საკითხები დადგება სასამართლოში სანდოობის თვალსაზრისით. რომელი ჩვენებები უნდა გავიზიაროთ, რომელიც ფიცის ქვეშ არის მიცემული და შემდგომ საჯარო განცხადებებში აცდენილია? შეიძლება ითქვას, რომ გარკვეული საკითხები დამალულია", — აღნიშნა ადვოკატმა.

On.ge-მ სცადა დავით ხიდაშელთან დაკავშირება, თუმცა მან ჩვენს ზარებსა და შეტყობინებებს არ უპასუხა.