ლელომ ახალი პროგრამა — ძლიერი და ეკონომიკურად დამოუკიდებელი ქალი — წარადგინა. ღონისძიება ლელოს თავმჯდომარემ, მამუკა ხაზარაძემ გახსნა, ხოლო, პარტიის პოლიტიკური საბჭოს წევრმა მედეა მეტრეველმა დამსწრე საზოგადოებას პროგრამა დეტალურად გააცნო. წარდგენის შემდეგ დისკუსია გაიმართა, რომელიც საქართველოში ქალების წინაშე არსებულ გამოწვევებს შეეხო.

მამუკა ხაზარაძემ განმარტავს, რომ მათთვის გაუგებარია ქალების კვოტირების საკითხი, რადგან ლელო მათ ყოველთვის თანაბარ ძალად მიიჩნევდა. ამის დასტურად, ხაზარაძემ აღნიშნა, რომ პარტია შექმნის დღიდან ქალებით იყო დაკომპლექტებული.

"კვოტირების გამოცხადების პირველივე დღიდან ჩვენი პარტიისთვის გაუგებარი იყო, რა საჭიროებას წარმოდგენა იგი, რადგან ლელოს გუნდი შექმნის დღიდან დაკომპლექტებულია ქალებით და ვთვლით, რომ მათ შეუძლიათ ქვეყნის უკეთესობისკენ შეცვლა. დღეს თუ ეს ქვეყანა ვინმეზე დგას, დგას ქალებზე. ამას ვლაპარაკობ არა იმის გამო, რომ ქალი არის დედა, მშობელი ან შვილი, არამედ ეკონომიკური თვალსაზრისით, დღევანდელ დღემდე რომ მოვედით, ეს არის ჩვენი ემიგრანტი ქალების დამსახურება, რომლებმაც თავიანთი ურთულესი შრომის ხარჯზე მოიყვანეს ეს ქვეყანა დღევანდელ დღემდე. ამიტომ დადგა დრო, ქალები გამოვიდნენ წინა პლანზე. ჩვენ ამას ყოველ ჯერზე შევუწყობთ ხელს. ლელოს ამოცანაა რაც შეიძლება ბევრი, ეკონომიკურად დამოუკიდებელი ქალი ამ ქვეყანაში.

ლელოს ახალი მარშალის გეგმას, რომელიც ბოლო 30 წლის განმავლობაში შეიქმნა პირველად, 4 წელში ამ ქვეყნის გამოყვანა შეუძლია კრიზისიდან ყველა მიმართულებით, იქნება ეს ქალთა, ეკონომიკური, კულტურული თუ შემეცნებითი მიმართულება", — განაცხადა ხაზარაძემ.

მედეა მეტრეველის განმარტებით, ლელო ხელს უწყობს ქალების გაძლიერებასა და ინტეგრირებას სხვადასხვა სფეროში.

"ჩვენ ყურადღებას ვამახვილებთ ქალების ეკონომიკურად გაძლიერებაზე. თუ ჩვენ ვსაუბრობთ თანასწორ გარემოზე, თანასწორ საზოგადოებაზე, ქალების უფლებები, მათ შორის შრომით ანაზღაურების კუთხით თუ სხვა მიმართულებით, უნდა იყოს დაცული. რადგან ქალთა სიღარიბესთან ბრძოლისთვის ამას აქვს გადამწყვეტი მნიშვნელობა. ძლიერი ქალი ნიშნავს ძლიერ ქვეყნას და ეს ამ დარბაზში არაერთხელ ვთქვით. ჩვენი პარტია ამ მიმართულებას დიდ მხარდაჭერას უცხადებს. ლელოს "მარშალის გეგმის" მიხედვით ქალთა გაძლიერება ჩვენი პრიორიტეტია", — განაცხადა მეტრეველმა.

ღონისძიებას ესწრებოდნენ არასამთავრობო ორგანიზაციის წარმომადგენლები, მოწვეული სტუმრები და ლელოს ქალთა საბჭოების წევრები.