ტელეკომპანია იბერიას მფლობელები, საქართველოს პატრიოტთა ალიანსის სიით არჩეული ცოლ-ქმარი, ნატო ჩხეიძე და ზაზა ოქუაშვილი, თანამდებობის პირები არიან. 5 იანვრის მონაცემებით, პარლამენტის წევრი ჩხეიძე კვლავ ფლობს ტელეკომპანიის 30-პროცენტიანი წილს, აჭარის უმაღლესი საბჭოს წევრი ოქუაშვილი კი - დარჩენილ 70 პროცენტს. ამით ორივე მათგანი „მაუწყებლობის შესახებ“ კანონს არღვევენ.

"მაუწყებლობის შესახებ" კანონის მიხედვით, თანამდებობის პირი, მათ შორის პარლამენტისა და უმაღლესი საბჭოს წევრები, მაუწყებლობის სფეროში არ შეიძლება ფლობდნენ ლიცენზიას ან იყვნენ ავტორიზებული პირები. კომისიამ საკითხის შესასწავლად ადმინისტრაციული სამართალწარმოება 29 დეკემბერს დაიწყო. დარღვევის დადასტურების შემთხვევაში, იბერია TV-ს საწყის ეტაპზე სიტყვიერი გაფრთხილება მიეცემა, შემდეგ კი ფინანსური სანქცია. ფინანსური სანქციის გამოყენების შემდეგ თუ დარღვევა არ აღმოიფხვრება, ტელევიზიას ავტორიზაცია შეუჩერდება, რაც მაუწყებლობის უფლების შეჩერებას ნიშნავს.

საქართველოს კომუნიკაციების ეროვნული კომისია ტელეკომპანიის მფლობელების შესახებ განახლებული ინფორმაციის მიწოდებას 2016 წლის 21 ნოემბრიდან ითხოვს, თუმცა, უშედეგოდ. არხის მფლობელებმა საკუთარი წილები მართვის უფლებით სხვა პირებს გადასცეს, მაგრამ ამით კანონის მოთხოვნა მაინც არ სრულდება.

ნატო ჩხეიძე საქართველოს პარლამენტში 8 ოქტომბერს გამართული არჩევნების შედეგებით მოხვდა, ზაზა ოქუაშვილმა კი ამავე დღეს გამართული აჭარის უმაღლესი საბჭოს არჩევნებით არჩეული დავით თარხან-მოურავი 26 დეკემბერს ჩაანაცვლა.

ნატო ჩხეიძის მიერ 2016 წლის 30 დეკემბერს შევსებული დეკლარაციის მიხედვით, მას და მის ქმარს რამდენიმე ბინა, მიწის ნაკვეთი, არასაცხოვრებელი ფართი და სახლი ეკუთვნით. გარდა ამისა, BMW X6, ფერწერული ტილო (157), 40 000 დოლარის ღირებულების ფასიანი ქაღალდები, 5 მილიონი დოლარის ღირებულების ობლიგაციები, ანგარიშზე - 230 275 ლარი, 104 910 ლარი, 114 400 დოლარი და 55 477 ბრიტანული გირვანქა სტერლინგი და ნაღდი ფულის სახით კი - 16 100 ლარი აქვთ დეკლარაციაში მითითებული.

საქართველოში პარლამენტის წევრის თანამდებობრივი სარგო 2 ათასი ლარია, სადეპუტატო უფლებამოსილების განხორციელების თანხა კი - 1 790 ლარი.